asya śrīnārāyaṇahṛdayastōtramantrasya bhārgava ṛṣiḥ, anuṣṭupChandaḥ, śrīlakṣmīnārāyaṇō dēvatā, ōṁ bījaṃ, namaśśaktiḥ, nārāyaṇāyēti kīlakaṃ, śrīlakṣmīnārāyaṇa prītyarthē japē viniyōgaḥ । karanyāsaḥ । ōṁ nārāyaṇaḥ paraṃ jyōtiriti aṅguṣṭhābhyāṃ namaḥ । nārāyaṇaḥ paraṃ brahmēti tarjanībhyāṃ namaḥ । nārāyaṇaḥ parō dēva iti madhyamābhyāṃ namaḥ । nārāyaṇaḥ paraṃ dhāmēti anāmikābhyāṃ namaḥ । nārāyaṇaḥ parō dharma iti kaniṣṭhikābhyāṃ namaḥ । viśvaṃ nārāyaṇa iti karatalakarapṛṣṭhābhyāṃ namaḥ । aṅganyāsaḥ । nārāyaṇaḥ paraṃ jyōtiriti hṛdayāya namaḥ । nārāyaṇaḥ paraṃ brahmēti śirasē svāhā । nārāyaṇaḥ parō dēva iti śikhāyai vauṣaṭ । nārāyaṇaḥ paraṃ dhāmēti kavachāya hum । nārāyaṇaḥ parō dharma iti nētrābhyāṃ vauṣaṭ । viśvaṃ nārāyaṇa iti astrāya phaṭ । digbandhaḥ । ōṁ aindryādidaśadiśaṃ ōṁ namaḥ sudarśanāya sahasrārāya huṃ phaṭ badhnāmi namaśchakrāya svāhā । iti pratidiśaṃ yōjyam । atha dhyānam । udyādādityasaṅkāśaṃ pītavāsaṃ chaturbhujam । śaṅkhachakragadāpāṇiṃ dhyāyēllakṣmīpatiṃ harim ॥ 1 ॥ trailōkyādhārachakraṃ tadupari kamaṭhaṃ tatra chānantabhōgī tanmadhyē bhūmipadmāṅkuśaśikharadaḻaṃ karṇikābhūtamērum । tatrasthaṃ śāntamūrtiṃ maṇimayamakuṭaṃ kuṇḍalōdbhāsitāṅgaṃ lakṣmīnārāyaṇākhyaṃ sarasijanayanaṃ santataṃ chintayāmi ॥ 2 ॥ atha mūlāṣṭakam । ōm ॥ nārāyaṇaḥ paraṃ jyōtirātmā nārāyaṇaḥ paraḥ । nārāyaṇaḥ paraṃ brahma nārāyaṇa namō'stu tē ॥ 1 ॥ nārāyaṇaḥ parō dēvō dhātā nārāyaṇaḥ paraḥ । nārāyaṇaḥ parō dhātā nārāyaṇa namō'stu tē ॥ 2 ॥ nārāyaṇaḥ paraṃ dhāma dhyānaṃ nārāyaṇaḥ paraḥ । nārāyaṇa parō dharmō nārāyaṇa namō'stu tē ॥ 3 ॥ nārāyaṇaḥ parōvēdyaḥ vidyā nārāyaṇaḥ paraḥ । viśvaṃ nārāyaṇaḥ sākṣānnārāyaṇa namō'stu tē ॥ 4 ॥ nārāyaṇādvidhirjātō jātō nārāyaṇādbhavaḥ । jātō nārāyaṇādindrō nārāyaṇa namō'stu tē ॥ 5 ॥ ravirnārāyaṇastējaḥ chandrō nārāyaṇō mahaḥ । vahnirnārāyaṇaḥ sākṣānnārāyaṇa namō'stu tē ॥ 6 ॥ nārāyaṇa upāsyaḥ syādgururnārāyaṇaḥ paraḥ । nārāyaṇaḥ parō bōdhō nārāyaṇa namō'stu tē ॥ 7 ॥ nārāyaṇaḥ phalaṃ mukhyaṃ siddhirnārāyaṇaḥ sukham । sēvyōnārāyaṇaḥ śuddhō nārāyaṇa namō'stu tē ॥ 8 ॥ [hari] atha prārthanādaśakam । nārāyaṇa tvamēvāsi daharākhyē hṛdi sthitaḥ । prērakaḥ prēryamāṇānāṃ tvayā prēritamānasaḥ ॥ 9 ॥ tvadājñāṃ śirasā dhṛtvā japāmi janapāvanam । nānōpāsanamārgāṇāṃ bhavakṛdbhāvabōdhakaḥ ॥ 10 ॥ bhāvārthakṛdbhavātītō bhava saukhyapradō mama । tvanmāyāmōhitaṃ viśvaṃ tvayaiva parikalpitam ॥ 11 ॥ tvadadhiṣṭhānamātrēṇa sā vai sarvārthakāriṇī । tvamētāṃ cha puraskṛtya sarvakāmānpradarśaya ॥ 12 ॥ na mē tvadanyastrātāsti tvadanyanna hi daivatam । tvadanyaṃ na hi jānāmi pālakaṃ puṇyavardhanam ॥ 13 ॥ yāvatsāṃsārikō bhāvō manassthō bhāvanātmakaḥ । tāvatsiddhirbhavētsādhyā sarvathā sarvadā vibhō ॥ 14 ॥ pāpināmahamēvāgryō dayāḻūnāṃ tvamagraṇīḥ । dayanīyō madanyō'sti tava kō'tra jagattrayē ॥ 15 ॥ tvayāhaṃ naiva sṛṣṭaśchēnna syāttava dayāḻutā । āmayō vā na sṛṣṭaśchēdauṣadhasya vṛthōdayaḥ ॥ 16 ॥ pāpasaṅghapariśrāntaḥ pāpātmā pāparūpadhṛt । tvadanyaḥ kō'tra pāpēbhyastrātāsti jagatītalē ॥ 17 ॥ tvamēva mātā cha pitā tvamēva tvamēva bandhuścha sakhā tvamēva । tvamēva sēvyaścha gurustvamēva tvamēva sarvaṃ mama dēva dēva ॥ 18 ॥ prārthanādaśakaṃ chaiva mūlāṣṭakamataḥ param । yaḥ paṭhēchChṛṇuyānnityaṃ tasya lakṣmīḥ sthirā bhavēt ॥ 19 ॥ nārāyaṇasya hṛdayaṃ sarvābhīṣṭaphalapradam । lakṣmīhṛdayakaṃ stōtraṃ yadi chēttadvinākṛtam ॥ 20 ॥ tatsarvaṃ niṣphalaṃ prōktaṃ lakṣmīḥ kruddhyati sarvadā । ētatsaṅkalitaṃ stōtraṃ sarvakāmaphalapradam ॥ 21 ॥ lakṣmīhṛdayakaṃ chaiva tathā nārāyaṇātmakam । japēdyaḥ saṅkalīkṛtya sarvābhīṣṭamavāpnuyāt ॥ 22 ॥ nārāyaṇasya hṛdayamādau japtvā tataḥ param । lakṣmīhṛdayakaṃ stōtraṃ japēnnārāyaṇaṃ punaḥ ॥ 23 ॥ punarnārāyaṇaṃ japtvā punarlakṣmīnutiṃ japēt । punarnārāyaṇaṃ jāpyaṃ saṅkalīkaraṇaṃ bhavēt ॥ 24 ॥ ēvaṃ madhyē dvivārēṇa japētsaṅkalitaṃ tu tat । lakṣmīhṛdayakaṃ stōtraṃ sarvakāmaprakāśitam ॥ 25 ॥ tadvajjapādikaṃ kuryādētatsaṅkalitaṃ śubham । sarvānkāmānavāpnōti ādhivyādhibhayaṃ harēt ॥ 26 ॥ gōpyamētatsadā kuryānna sarvatra prakāśayēt । iti guhyatamaṃ śāstraṃ prāptaṃ brahmādikaiḥ purā ॥ 27 ॥ tasmātsarvaprayatnēna gōpayētsādhayēsudhīḥ । yatraitatpustakaṃ tiṣṭhēllakṣmīnārāyaṇātmakam ॥ 28 ॥ bhūtapaiśāchavētāḻa bhayaṃ naiva tu sarvadā । lakṣmīhṛdayakaṃ prōktaṃ vidhinā sādhayētsudhīḥ ॥ 29 ॥ bhṛguvārē cha rātrau cha pūjayētpustakadvayam । sarvathā sarvadā satyaṃ gōpayētsādhayētsudhīḥ । gōpanātsādhanāllōkē dhanyō bhavati tattvataḥ ॥ 30 ॥ ityatharvarahasyē uttarabhāgē nārāyaṇahṛdayaṃ sampūrṇam । atha lakṣmī hṛdaya stōtram asya śrī mahālakṣmīhṛdayastōtra mahāmantrasya bhārgava ṛṣiḥ, anuṣṭupādīni nānāChandāṃsi, ādyādi śrīmahālakṣmīrdēvatā, śrīṃ bījaṃ, hrīṃ śaktiḥ, aiṃ kīlakaṃ, ādyādimahālakṣmī prasādasiddhyarthaṃ japē viniyōgaḥ ॥ ṛṣyādinyāsaḥ – ōṁ bhārgavṛṣayē namaḥ śirasi । ōṁ anuṣṭupādinānāChandōbhyō namō mukhē । ōṁ ādyādiśrīmahālakṣmī dēvatāyai namō hṛdayē । ōṁ śrīṃ bījāya namō guhyē । ōṁ hrīṃ śaktayē namaḥ pādayōḥ । ōṁ aiṃ kīlakāya namō nābhau । ōṁ viniyōgāya namaḥ sarvāṅgē । karanyāsaḥ – ōṁ śrīṃ aṅguṣṭhābhyāṃ namaḥ । ōṁ hrīṃ tarjanībhyāṃ namaḥ । ōṁ aiṃ madhyamābhyāṃ namaḥ । ōṁ śrīṃ anāmikābhyāṃ namaḥ । ōṁ hrīṃ kaniṣṭhikābhyāṃ namaḥ । ōṁ aiṃ karatala karapṛṣṭhābhyāṃ namaḥ । aṅganyāsaḥ – ōṁ śrīṃ hṛdayāya namaḥ । ōṁ hrīṃ śirasē svāhā । ōṁ aiṃ śikhāyai vaṣaṭ । ōṁ śrīṃ kavachāya hum । ōṁ hrīṃ nētratrayāya vauṣaṭ । ōṁ aiṃ astrāya phaṭ । ōṁ śrīṃ hrīṃ aiṃ iti digbandhaḥ । atha dhyānam । hastadvayēna kamalē dhārayantīṃ svalīlayā । hāranūpurasaṃyuktāṃ lakṣmīṃ dēvīṃ vichintayē ॥ kauśēyapītavasanāmaravindanētrāṃ padmadvayābhayavarōdyatapadmahastām । udyachChatārkasadṛśīṃ paramāṅkasaṃsthāṃ dhyāyēdvidhīśanatapādayugāṃ janitrīm ॥ pītavastrāṃ suvarṇāṅgīṃ padmahastadvāyānvitām । lakṣmīṃ dhyātvēti mantrēṇa sa bhavētpṛthivīpatiḥ ॥ mātuluṅgaṃ gadāṃ khēṭaṃ pāṇau pātraṃ cha bibhratī । nāgaṃ liṅgaṃ cha yōniṃ cha bibhratīṃ chaiva mūrdhani ॥ [ iti dhyātvā mānasōpachāraiḥ sampūjya । śaṅkhachakragadāhastē śubhravarṇē suvāsinī । mama dēhi varaṃ lakṣmīḥ sarvasiddhipradāyinī । iti samprārthya ōṁ śrīṃ hrīṃ aiṃ mahālakṣmyai kamaladhāriṇyai siṃhavāhinyai svāhā iti mantraṃ japtvā punaḥ pūrvavaddhṛdayādi ṣaḍaṅganyāsaṃ kṛtvā stōtraṃ paṭhēt । ] stōtram । vandē lakṣmīṃ paramaśivamayīṃ śuddhajāmbūnadābhāṃ tējōrūpāṃ kanakavasanāṃ sarvabhūṣōjjvalāṅgīm । bījāpūraṃ kanakakalaśaṃ hēmapadmaṃ dadhānā- -mādyāṃ śaktiṃ sakalajananīṃ viṣṇuvāmāṅkasaṃsthām ॥ 1 ॥ śrīmatsaubhāgyajananīṃ staumi lakṣmīṃ sanātanīm । sarvakāmaphalāvāptisādhanaikasukhāvahām ॥ 2 ॥ smarāmi nityaṃ dēvēśi tvayā prēritamānasaḥ । tvadājñāṃ śirasā dhṛtvā bhajāmi paramēśvarīm ॥ 3 ॥ samastasampatsukhadāṃ mahāśriyaṃ samastasaubhāgyakarīṃ mahāśriyam । samastakaḻyāṇakarīṃ mahāśriyaṃ bhajāmyahaṃ jñānakarīṃ mahāśriyam ॥ 4 ॥ vijñānasampatsukhadāṃ sanātanīṃ vichitravāgbhūtikarīṃ manōharām । anantasammōdasukhapradāyinīṃ namāmyahaṃ bhūtikarīṃ haripriyām ॥ 5 ॥ samastabhūtāntarasaṃsthitā tvaṃ samastabhōktrīśvari viśvarūpē । tannāsti yattvadvyatiriktavastu tvatpādapadmaṃ praṇamāmyahaṃ śrīḥ ॥ 6 ॥ dāridrya duḥkhaughatamōpahantrī tvatpādapadmaṃ mayi sannidhatsva । dīnārtivichChēdanahētubhūtaiḥ kṛpākaṭākṣairabhiṣiñcha māṃ śrīḥ ॥ 7 ॥ amba prasīda karuṇāsudhayārdradṛṣṭyā māṃ tvatkṛpādraviṇagēhamimaṃ kuruṣva । ālōkaya praṇatahṛdgataśōkahantrī tvatpādapadmayugaḻaṃ praṇamāmyahaṃ śrīḥ ॥ 8 ॥ śāntyai namō'stu śaraṇāgatarakṣaṇāyai kāntyai namō'stu kamanīyaguṇāśrayāyai । kṣāntyai namō'stu duritakṣayakāraṇāyai dātryai namō'stu dhanadhānyasamṛddhidāyai ॥ 9 ॥ śaktyai namō'stu śaśiśēkharasaṃstutāyai ratyai namō'stu rajanīkarasōdarāyai । bhaktyai namō'stu bhavasāgaratārakāyai matyai namō'stu madhusūdanavallabhāyai ॥ 10 ॥ lakṣmyai namō'stu śubhalakṣaṇalakṣitāyai siddhyai namō'stu śivasiddhasupūjitāyai । dhṛtyai namō'stvamitadurgatibhañjanāyai gatyai namō'stu varasadgatidāyikāyai ॥ 11 ॥ dēvyai namō'stu divi dēvagaṇārchitāyai bhūtyai namō'stu bhuvanārtivināśanāyai । dhātryai namō'stu dharaṇīdharavallabhāyai puṣṭyai namō'stu puruṣōttamavallabhāyai ॥ 12 ॥ sutīvradāridryaviduḥkhahantryai namō'stu tē sarvabhayāpahantryai । śrīviṣṇuvakṣaḥsthalasaṃsthitāyai namō namaḥ sarvavibhūtidāyai ॥ 13 ॥ jayatu jayatu lakṣmīrlakṣaṇālaṅkṛtāṅgī jayatu jayatu padmā padmasadmābhivandyā । jayatu jayatu vidyā viṣṇuvāmāṅkasaṃsthā jayatu jayatu samyaksarvasampatkarī śrīḥ ॥ 14 ॥ jayatu jayatu dēvī dēvasaṅghābhipūjyā jayatu jayatu bhadrā bhārgavī bhāgyarūpā । jayatu jayatu nityā nirmalajñānavēdyā jayatu jayatu satyā sarvabhūtāntarasthā ॥ 15 ॥ jayatu jayatu ramyā ratnagarbhāntarasthā jayatu jayatu śuddhā śuddhajāmbūnadābhā । jayatu jayatu kāntā kāntimadbhāsitāṅgī jayatu jayatu śāntā śīghramāgachCha saumyē ॥ 16 ॥ yasyāḥ kalāyāḥ kamalōdbhavādyā rudrāścha śakra pramukhāścha dēvāḥ । jīvanti sarvē'pi saśaktayastē prabhutvamāptāḥ paramāyuṣastē ॥ 17 ॥ lilēkha niṭilē vidhirmama lipiṃ visṛjyāntaraṃ tvayā vilikhitavyamētaditi tatphalaprāptayē । tadantaraphalēsphuṭaṃ kamalavāsinī śrīrimāṃ samarpaya samudrikāṃ sakalabhāgyasaṃsūchikām ॥ 18 ॥ kalayā tē yathā dēvi jīvanti sacharācharāḥ । tathā sampatkarē lakṣmi sarvadā samprasīda mē ॥ 19 ॥ yathā viṣṇurdhruvē nityaṃ svakalāṃ sannyavēśayat । tathaiva svakalāṃ lakṣmi mayi samyak samarpaya ॥ 20 ॥ sarvasaukhyapradē dēvi bhaktānāmabhayapradē । achalāṃ kuru yatnēna kalāṃ mayi nivēśitām ॥ 21 ॥ mudāstāṃ matphālē paramapadalakṣmīḥ sphuṭakalā sadā vaikuṇṭhaśrīrnivasatu kalā mē nayanayōḥ । vasētsatyē lōkē mama vachasi lakṣmīrvarakalā śriyaḥ śvētadvīpē nivasatu kalā mē svakarayōḥ ॥ 22 ॥ tāvannityaṃ mamāṅgēṣu kṣīrābdhau śrīkalā vasēt । sūryāchandramasau yāvadyāvallakṣmīpatiḥ śriyāḥ ॥ 23 ॥ sarvamaṅgaḻasampūrṇā sarvaiśvaryasamanvitā । ādyādi śrīrmahālakṣmī tvatkalā mayi tiṣṭhatu ॥ 24 ॥ ajñānatimiraṃ hantuṃ śuddhajñānaprakāśikā । sarvaiśvaryapradā mē'stu tvatkalā mayi saṃsthitā ॥ 25 ॥ alakṣmīṃ haratu kṣipraṃ tamaḥ sūryaprabhā yathā । vitanōtu mama śrēyastvatkaḻā mayi saṃsthitā ॥ 26 ॥ aiśvaryamaṅgaḻōtpattistvatkalāyāṃ nidhīyatē । mayi tasmātkṛtārthō'smi pātramasmi sthitēstava ॥ 27 ॥ bhavadāvēśabhāgyārhō bhāgyavānasmi bhārgavi । tvatprasādātpavitrō'haṃ lōkamātarnamō'stu tē ॥ 28 ॥ punāsi māṃ tvatkalayaiva yasmā- -dataḥ samāgachCha mamāgratastvam । paraṃ padaṃ śrīrbhava suprasannā mayyachyutēna praviśādilakṣmīḥ ॥ 29 ॥ śrīvaikuṇṭhasthitē lakṣmi samāgachCha mamāgrataḥ । nārāyaṇēna saha māṃ kṛpādṛṣṭyā'valōkaya ॥ 30 ॥ satyalōkasthitē lakṣmi tvaṃ mamāgachCha sannidhim । vāsudēvēna sahitā prasīda varadā bhava ॥ 31 ॥ śvētadvīpasthitē lakṣmi śīghramāgachCha suvratē । viṣṇunā sahitē dēvi jaganmātaḥ prasīda mē ॥ 32 ॥ kṣīrāmbudhisthitē lakṣmi samāgachCha samādhavā । tvatkṛpādṛṣṭisudhayā satataṃ māṃ vilōkaya ॥ 33 ॥ ratnagarbhasthitē lakṣmi paripūrṇē hiraṇmayē । samāgachCha samāgachCha sthitvā''śu puratō mama ॥ 34 ॥ sthirā bhava mahālakṣmi niśchalā bhava nirmalē । prasannē kamalē dēvi prasannahṛdayā bhava ॥ 35 ॥ śrīdharē śrīmahābhūtē tvadantaḥsthaṃ mahānidhim । śīghramuddhṛtya purataḥ pradarśaya samarpaya ॥ 36 ॥ vasundharē śrīvasudhē vasudōgdhri kṛpāmayē । tvatkukṣigatasarvasvaṃ śīghraṃ mē sampradarśaya ॥ 37 ॥ viṣṇupriyē ratnagarbhē samastaphaladē śivē । tvadgarbhagatahēmādīn sampradarśaya darśaya ॥ 38 ॥ rasātalagatē lakṣmi śīghramāgachCha mē puraḥ । na jānē paramaṃ rūpaṃ mātarmē sampradarśaya ॥ 39 ॥ āvirbhava manōvēgāchChīghramāgachCha mē puraḥ । mā vatsa bhairihētyuktvā kāmaṃ gauriva rakṣa mām ॥ 40 ॥ dēvi śīghraṃ samāgachCha dharaṇīgarbhasaṃsthitē । mātastvadbhṛtyabhṛtyō'haṃ mṛgayē tvāṃ kutūhalāt ॥ 41 ॥ uttiṣṭha jāgṛhi tvaṃ mē samuttiṣṭha sujāgṛhi । akṣayān hēmakalaśān suvarṇēna supūritān ॥ 42 ॥ nikṣēpānmē samākṛṣya samuddhṛtya mamāgrataḥ । samunnatānanā bhūtvā samādhēhi dharāntarāt ॥ 43 ॥ matsannidhiṃ samāgachCha madāhitakṛpārasāt । prasīda śrēyasāṃ dōgdhrī lakṣmīrmē nayanāgrataḥ ॥ 44 ॥ atrōpaviśa lakṣmi tvaṃ sthirā bhava hiraṇmayē । susthirā bhava samprītyā prasīda varadā bhava ॥ 45 ॥ ānītāṃstu tathā dēvi nidhīnmē sampradarśaya । adya kṣaṇēna sahasā dattvā saṃrakṣa māṃ sadā ॥ 46 ॥ mayi tiṣṭha tathā nityaṃ yathēndrādiṣu tiṣṭhasi । abhayaṃ kuru mē dēvi mahālakṣmīrnamō'stu tē ॥ 47 ॥ samāgachCha mahālakṣmi śuddhajāmbūnadaprabhē । prasīda purataḥ sthitvā praṇataṃ māṃ vilōkaya ॥ 48 ॥ lakṣmīrbhuvaṃ gatā bhāsi yatra yatra hiraṇmayī । tatra tatra sthitā tvaṃ mē tava rūpaṃ pradarśaya ॥ 49 ॥ krīḍantī bahudhā bhūmau paripūrṇakṛpāmayi । mama mūrdhani tē hastamavilambitamarpaya ॥ 50 ॥ phaladbhāgyōdayē lakṣmi samastapuravāsinī । prasīda mē mahālakṣmi paripūrṇamanōrathē ॥ 51 ॥ ayōdhyādiṣu sarvēṣu nagarēṣu samāsthitē । vaibhavairvividhairyuktaiḥ samāgachCha mudānvitē ॥ 52 ॥ samāgachCha samāgachCha mamāgrē bhava susthirā । karuṇārasaniṣyandanētradvaya vilāsinī ॥ 53 ॥ [niṣpanna] sannidhatsva mahālakṣmi tvatpāṇiṃ mama mastakē । karuṇāsudhayā māṃ tvamabhiṣiñchya sthiraṃ kuru ॥ 54 ॥ sarvarājagṛhē lakṣmi samāgachCha balānvitē । [mudānvitē] sthitvā''śu puratō mē'dya prasādēnā'bhayaṃ kuru ॥ 55 ॥ sādaraṃ mastakē hastaṃ mama tvaṃ kṛpayārpaya । sarvarājagṛhē lakṣmi tvatkalā mayi tiṣṭhatu ॥ 56 ॥ ādyādi śrīmahālakṣmi viṣṇuvāmāṅkasaṃsthitē । pratyakṣaṃ kuru mē rūpaṃ rakṣa māṃ śaraṇāgatam ॥ 57 ॥ prasīda mē mahālakṣmi suprasīda mahāśivē । achalā bhava samprītyā susthirā bhava madgṛhē ॥ 58 ॥ yāvattiṣṭhanti vēdāścha yāvachchandradivākarau । yāvadviṣṇuścha yāvattvaṃ tāvatkuru kṛpāṃ mayi ॥ 59 ॥ chāndrīkalā yathā śuklē vardhatē sā dinē dinē । tathā dayā tē mayyēva vardhatāmabhivardhatām ॥ 60 ॥ yathā vaikuṇṭhanagarē yathā vai kṣīrasāgarē । tathā madbhavanē tiṣṭha sthiraṃ śrīviṣṇunā saha ॥ 61 ॥ yōgināṃ hṛdayē nityaṃ yathā tiṣṭhasi viṣṇunā । tathā madbhavanē tiṣṭha sthiraṃ śrīviṣṇunā saha ॥ 62 ॥ nārāyaṇasya hṛdayē bhavatī yathāstē nārāyaṇō'pi tava hṛtkamalē yathāstē । nārāyaṇastvamapi nityamubhau tathaiva tau tiṣṭhatāṃ hṛdi mamāpi dayānvitau śrīḥ ॥ 63 ॥ vijñānavṛddhiṃ hṛdayē kuru śrīḥ saubhāgyavṛddhiṃ kuru mē gṛhē śrīḥ । dayāsuvṛddhiṃ kurutāṃ mayi śrīḥ suvarṇavṛddhiṃ kuru mē gṛhē śrīḥ ॥ 64 ॥ na māṃ tyajēthāḥ śritakalpavalli sadbhaktachintāmaṇikāmadhēnō । viśvasya mātarbhava suprasannā gṛhē kalatrēṣu cha putravargē ॥ 65 ॥ ādyādimāyē tvamajāṇḍabījaṃ tvamēva sākāranirākṛtistvam । tvayā dhṛtāśchābjabhavāṇḍasaṅghā- -śchitraṃ charitraṃ tava dēvi viṣṇōḥ ॥ 66 ॥ brahmarudrādayō dēvā vēdāśchāpi na śaknuyuḥ । mahimānaṃ tava stōtuṃ mandō'haṃ śaknuyāṃ katham ॥ 67 ॥ amba tvadvatsavākyāni sūktāsūktāni yāni cha । tāni svīkuru sarvajñē dayālutvēna sādaram ॥ 68 ॥ bhavatīṃ śaraṇaṃ gatvā kṛtārthāḥ syuḥ purātanāḥ । iti sañchintya manasā tvāmahaṃ śaraṇaṃ vrajē ॥ 69 ॥ anantā nityasukhinastvadbhaktāstvatparāyaṇāḥ । iti vēdapramāṇāddhi dēvi tvāṃ śaraṇaṃ vrajē ॥ 70 ॥ tava pratijñā madbhaktā na naśyantītyapi kvachit । iti sañchintya sañchintya prāṇān sandhārayāmyaham ॥ 71 ॥ tvadadhīnastvahaṃ mātastvatkṛpā mayi vidyatē । yāvatsampūrṇakāmaḥ syāttāvaddēhi dayānidhē ॥ 72 ॥ kṣaṇamātraṃ na śaknōmi jīvituṃ tvatkṛpāṃ vinā । na jīvantīha jalajā jalaṃ tyaktvā jalagrahāḥ ॥ 73 ॥ yathā hi putravātsalyājjananī prasnutastanī । vatsaṃ tvaritamāgatya samprīṇayati vatsalā ॥ 74 ॥ yadi syāṃ tava putrō'haṃ mātā tvaṃ yadi māmakī । dayāpayōdharastanyasudhābhirabhiṣiñcha mām ॥ 75 ॥ mṛgyō na guṇalēśō'pi mayi dōṣaikamandirē । pāṃsūnāṃ vṛṣṭibindūnāṃ dōṣāṇāṃ cha na mē matiḥ ॥ 76 ॥ pāpināmahamēvāgryō dayālūnāṃ tvamagraṇīḥ । dayanīyō madanyō'sti tava kō'tra jagattrayē ॥ 77 ॥ vidhināhaṃ na sṛṣṭaśchēnna syāttava dayālutā । āmayō vā na sṛṣṭaśchēdauṣadhasya vṛthōdayaḥ ॥ 78 ॥ kṛpā madagrajā kiṃ tē ahaṃ kiṃ vā tadagrajaḥ । vichārya dēhi mē vittaṃ tava dēvi dayānidhē ॥ 79 ॥ mātā pitā tvaṃ gurusadgatiḥ śrī- -stvamēva sañjīvanahētubhūtā । anyaṃ na manyē jagadēkanāthē tvamēva sarvaṃ mama dēvi satyē ॥ 80 ॥ ādyādilakṣmīrbhava suprasannā viśuddhavijñānasukhaikadōgdhrī । ajñānahantrī triguṇātiriktā prajñānanētrī bhava suprasannā ॥ 81 ॥ aśēṣavāgjāḍyamalāpahantrī navaṃ navaṃ spaṣṭasuvākpradāyinī । mamēha jihvāgra suraṅganartakī [nartinī] bhava prasannā vadanē cha mē śrīḥ ॥ 82 ॥ samastasampatsuvirājamānā samastatējaśchayabhāsamānā । viṣṇupriyē tvaṃ bhava dīpyamānā vāgdēvatā mē nayanē prasannā ॥ 83 ॥ sarvapradarśē sakalārthadē tvaṃ prabhāsulāvaṇyadayāpradōgdhrī । suvarṇadē tvaṃ sumukhī bhava śrī- -rhiraṇmayī mē nayanē prasannā ॥ 84 ॥ sarvārthadā sarvajagatprasūtiḥ sarvēśvarī sarvabhayāpahantrī । sarvōnnatā tvaṃ sumukhī bhava śrī- -rhiraṇmayī mē nayanē prasannā ॥ 85 ॥ samastavighnaughavināśakāriṇī samastabhaktōddharaṇē vichakṣaṇā । anantasaubhāgyasukhapradāyinī hiraṇmayī mē nayanē prasannā ॥ 86 ॥ dēvi prasīda dayanīyatamāya mahyaṃ dēvādhināthabhavadēvagaṇābhivandyē । mātastathaiva bhava sannihitā dṛśōrmē patyā samaṃ mama mukhē bhava suprasannā ॥ 87 ॥ mā vatsa bhairabhayadānakarō'rpitastē maulau mamēti mayi dīnadayānukampē । mātaḥ samarpaya mudā karuṇākaṭākṣaṃ māṅgaḻyabījamiha naḥ sṛja janma mātaḥ ॥ 88 ॥ kaṭākṣa iha kāmadhuktava manastu chintāmaṇiḥ karaḥ surataruḥ sadā navanidhistvamēvēndirē । bhavē tava dayārasō mama rasāyanaṃ chānvahaṃ mukhaṃ tava kalānidhirvividhavāñChitārthapradam ॥ 89 ॥ yathā rasasparśanatō'yasō'pi suvarṇatā syātkamalē tathā tē । kaṭākṣasaṃsparśanatō janānā- -mamaṅgaḻānāmapi maṅgaḻatvam ॥ 90 ॥ dēhīti nāstīti vachaḥ pravēśā- -dbhītō ramē tvāṃ śaraṇaṃ prapadyē । ataḥ sadā'sminnabhayapradā tvaṃ sahaiva patyā mayi sannidhēhi ॥ 91 ॥ kalpadrumēṇa maṇinā sahitā suramyā śrīstē kalā mayi rasēna rasāyanēna । āstāṃ yatō mama śiraḥkaradṛṣṭipāda- -spṛṣṭāḥ suvarṇavapuṣaḥ sthirajaṅgamāḥ syuḥ ॥ 92 ॥ ādyādiviṣṇōḥ sthiradharmapatnī tvamēva patyā mayi sannidhēhi । ādyādilakṣmi tvadanugrahēṇa padē padē mē nidhidarśanaṃ syāt ॥ 93 ॥ ādyādilakṣmīhṛdayaṃ paṭhēdyaḥ sa rājyalakṣmīmachalāṃ tanōti । mahādaridrō'pi bhavēddhanāḍhya- -stadanvayē śrīḥ sthiratāṃ prayāti ॥ 94 ॥ yasya smaraṇamātrēṇa tuṣṭā syādviṣṇuvallabhā । tasyābhīṣṭaṃ dadatyāśu taṃ pālayati putravat ॥ 95 ॥ idaṃ rahasyaṃ hṛdayaṃ sarvakāmaphalapradam । japaḥ pañchasahasraṃ tu puraścharaṇamuchyatē ॥ 96 ॥ trikālamēkakālaṃ vā narō bhaktisamanvitaḥ । yaḥ paṭhēchChṛṇuyādvāpi sa yāti paramāṃ śriyam ॥ 97 ॥ mahālakṣmīṃ samuddiśya niśi bhārgavavāsarē । idaṃ śrīhṛdayaṃ japtvā pañchavāraṃ dhanī bhavēt ॥ 98 ॥ anēna hṛdayēnānnaṃ garbhiṇyā abhimantritam । dadāti tatkulē putrō jāyatē śrīpatiḥ svayam ॥ 99 ॥ narēṇa vā'thavā nāryā lakṣmīhṛdayamantritē । jalē pītē cha tadvaṃśē mandabhāgyō na jāyatē ॥ 100 ॥ ya āśvinē māsi cha śuklapakṣē ramōtsavē sannihitē subhaktyā । paṭhēttathaikōttaravāravṛddhyā labhētsa sauvarṇamayīṃ suvṛṣṭim ॥ 101 ॥ ya ēkabhaktō'nvahamēkavarṣaṃ viśuddhadhīḥ saptativārajāpī । sa mandabhāgyō'pi ramākaṭākṣā- -dbhavētsahasrākṣaśatādhikaśrīḥ ॥ 102 ॥ śrīśāṅghribhaktiṃ haridāsadāsyaṃ prasannamantrārthadṛḍhaikaniṣṭhām । gurōḥ smṛtiṃ nirmalabōdhabuddhiṃ pradēhi mātaḥ paramaṃ padaṃ śrīḥ ॥ 103 ॥ pṛthvīpatitvaṃ puruṣōttamatvaṃ vibhūtivāsaṃ vividhārthasiddhim । sampūrṇakīrtiṃ bahuvarṣabhōgaṃ pradēhi mē lakṣmi punaḥ punastvam ॥ 104 ॥ vādārthasiddhiṃ bahulōkavaśyaṃ vayaḥ sthiratvaṃ lalanāsubhōgam । pautrādilabdhiṃ sakalārthasiddhiṃ pradēhi mē bhārgavi janmajanmani ॥ 105 ॥ suvarṇavṛddhiṃ kuru mē gṛhē śrīḥ sudhānyavṛddhiṃ kurū mē gṛhē śrīḥ । kalyāṇavṛddhiṃ kuru mē gṛhē śrīḥ vibhūtivṛddhiṃ kuru mē gṛhē śrīḥ ॥ 106 ॥ dhyāyēllakṣmīṃ prahasitamukhīṃ kōṭibālārkabhāsāṃ vidyudvarṇāmbaravaradharāṃ bhūṣaṇāḍhyāṃ suśōbhām । bījāpūraṃ sarasijayugaṃ bibhratīṃ svarṇapātraṃ bhartrāyuktāṃ muhurabhayadāṃ mahyamapyachyutaśrīḥ ॥ 107 ॥ guhyātiguhyagōptrī tvaṃ gṛhāṇāsmatkṛtaṃ japam । siddhirbhavatu mē dēvi tvatprasādānmayi sthitā ॥ 108 ॥ iti śrīatharvaṇarahasyē śrīlakṣmīhṛdayastōtraṃ sampūrṇam ॥