ಲಕ್ಷ್ಮೀ ಮೇ ಚಾಗ್ರತಃ ಪಾತು ಕಮಲಾ ಪಾತು ಪೃಷ್ಠತಃ । ನಾರಾಯಣೀ ಶೀರ್ಷದೇಶೇ ಸರ್ವಾಂಗೇ ಶ್ರೀಸ್ವರೂಪಿಣೀ ॥ 1 ॥ ರಾಮಪತ್ನೀ ತು ಪ್ರತ್ಯಂಗೇ ರಾಮೇಶ್ವರೀ ಸದಾಽವತು । ವಿಶಾಲಾಕ್ಷೀ ಯೋಗಮಾಯಾ ಕೌಮಾರೀ ಚಕ್ರಿಣೀ ತಥಾ ॥ 2 ॥ ಜಯದಾತ್ರೀ ಧನದಾತ್ರೀ ಪಾಶಾಕ್ಷಮಾಲಿನೀ ಶುಭಾ । ಹರಿಪ್ರಿಯಾ ಹರಿರಾಮಾ ಜಯಂಕರೀ ಮಹೋದರೀ ॥ 3 ॥ ಕೃಷ್ಣಪರಾಯಣಾ ದೇವೀ ಶ್ರೀಕೃಷ್ಣಮನಮೋಹಿನೀ । ಜಯಂಕರೀ ಮಹಾರೌದ್ರೀ ಸಿದ್ಧಿದಾತ್ರೀ ಶುಭಂಕರೀ ॥ 4 ॥ ಸುಖದಾ ಮೋಕ್ಷದಾ ದೇವೀ ಚಿತ್ರಕೂಟನಿವಾಸಿನೀ । ಭಯಂ ಹರತು ಭಕ್ತಾನಾಂ ಭವಬಂಧಂ ವಿಮುಂಚತು ॥ 5 ॥ ಕವಚಂ ತನ್ಮಹಾಪುಣ್ಯಂ ಯಃ ಪಠೇದ್ಭಕ್ತಿಸಮ್ಯುತಃ । ತ್ರಿಸಂಧ್ಯಮೇಕಸಂಧ್ಯಂ ವಾ ಮುಚ್ಯತೇ ಸರ್ವಸಂಕಟಾತ್ ॥ 6 ॥ ಕವಚಸ್ಯಾಸ್ಯ ಪಠನಂ ಧನಪುತ್ರವಿವರ್ಧನಂ । ಭೀತಿವಿನಾಶನಂ ಚೈವ ತ್ರಿಷು ಲೋಕೇಷು ಕೀರ್ತಿತಂ ॥ 7 ॥ ಭೂರ್ಜಪತ್ರೇ ಸಮಾಲಿಖ್ಯ ರೋಚನಾಕುಂಕುಮೇನ ತು । ಧಾರಣಾದ್ಗಲದೇಶೇ ಚ ಸರ್ವಸಿದ್ಧಿರ್ಭವಿಷ್ಯತಿ ॥ 8 ॥ ಅಪುತ್ರೋ ಲಭತೇ ಪುತ್ರಂ ಧನಾರ್ಥೀ ಲಭತೇ ಧನಂ । ಮೋಕ್ಷಾರ್ಥೀ ಮೋಕ್ಷಮಾಪ್ನೋತಿ ಕವಚಸ್ಯ ಪ್ರಸಾದತಃ ॥ 9 ॥ ಗರ್ಭಿಣೀ ಲಭತೇ ಪುತ್ರಂ ವಂಧ್ಯಾ ಚ ಗರ್ಭಿಣೀ ಭವೇತ್ । ಧಾರಯೇದ್ಯದಿ ಕಂಠೇ ಚ ಅಥವಾ ವಾಮಬಾಹುಕೇ ॥ 10 ॥ ಯಃ ಪಠೇನ್ನಿಯತೋ ಭಕ್ತ್ಯಾ ಸ ಏವ ವಿಷ್ಣುವದ್ಭವೇತ್ । ಮೃತ್ಯುವ್ಯಾಧಿಭಯಂ ತಸ್ಯ ನಾಸ್ತಿ ಕಿಂಚಿನ್ಮಹೀತಲೇ ॥ 11 ॥ ಪಠೇದ್ವಾ ಪಾಠಯೇದ್ವಾಪಿ ಶೃಣುಯಾಚ್ಛ್ರಾವಯೇದಪಿ । ಸರ್ವಪಾಪವಿಮುಕ್ತಸ್ತು ಲಭತೇ ಪರಮಾಂ ಗತಿಂ ॥ 12 ॥ ಸಂಕಟೇ ವಿಪದೇ ಘೋರೇ ತಥಾ ಚ ಗಹನೇ ವನೇ । ರಾಜದ್ವಾರೇ ಚ ನೌಕಾಯಾಂ ತಥಾ ಚ ರಣಮಧ್ಯತಃ ॥ 13 ॥ ಪಠನಾದ್ಧಾರಣಾದಸ್ಯ ಜಯಮಾಪ್ನೋತಿ ನಿಶ್ಚಿತಂ । ಅಪುತ್ರಾ ಚ ತಥಾ ವಂಧ್ಯಾ ತ್ರಿಪಕ್ಷಂ ಶೃಣುಯಾದ್ಯದಿ ॥ 14 ॥ ಸುಪುತ್ರಂ ಲಭತೇ ಸಾ ತು ದೀರ್ಘಾಯುಷ್ಕಂ ಯಶಸ್ವಿನಂ । ಶೃಣುಯಾದ್ಯಃ ಶುದ್ಧಬುದ್ಧ್ಯಾ ದ್ವೌ ಮಾಸೌ ವಿಪ್ರವಕ್ತ್ರತಃ ॥ 15 ॥ ಸರ್ವಾನ್ಕಾಮಾನವಾಪ್ನೋತಿ ಸರ್ವಬಂಧಾದ್ವಿಮುಚ್ಯತೇ । ಮೃತವತ್ಸಾ ಜೀವವತ್ಸಾ ತ್ರಿಮಾಸಂ ಶ್ರವಣಂ ಯದಿ ॥ 16 ॥ ರೋಗೀ ರೋಗಾದ್ವಿಮುಚ್ಯೇತ ಪಠನಾನ್ಮಾಸಮಧ್ಯತಃ । ಲಿಖಿತ್ವಾ ಭೂರ್ಜಪತ್ರೇ ಚ ಅಥವಾ ತಾಡಪತ್ರಕೇ ॥ 17 ॥ ಸ್ಥಾಪಯೇನ್ನಿಯತಂ ಗೇಹೇ ನಾಗ್ನಿಚೌರಭಯಂ ಕ್ವಚಿತ್ । ಶೃಣುಯಾದ್ಧಾರಯೇದ್ವಾಪಿ ಪಠೇದ್ವಾ ಪಾಠಯೇದಪಿ ॥ 18 ॥ ಯಃ ಪುಮಾನ್ಸತತಂ ತಸ್ಮಿನ್ಪ್ರಸನ್ನಾಃ ಸರ್ವದೇವತಾಃ । ಬಹುನಾ ಕಿಮಿಹೋಕ್ತೇನ ಸರ್ವಜೀವೇಶ್ವರೇಶ್ವರೀ ॥ 19 ॥ ಆದ್ಯಾಶಕ್ತಿಃ ಸದಾಲಕ್ಷ್ಮೀರ್ಭಕ್ತಾನುಗ್ರಹಕಾರಿಣೀ । ಧಾರಕೇ ಪಾಠಕೇ ಚೈವ ನಿಶ್ಚಲಾ ನಿವಸೇದ್ಧ್ರುವಂ ॥ 20 ॥ ಇತಿ ಶ್ರೀ ಲಕ್ಷ್ಮೀ ಕವಚಂ ।