കല്യാണവൃഷ്ടിഭിരിവാമൃതപൂരിതാഭി- -ര്ലക്ഷ്മീസ്വയംവരണമംഗലദീപികാഭിഃ । സേവാഭിരംബ തവ പാദസരോജമൂലേ നാകാരി കിം മനസി ഭാഗ്യവതാം ജനാനാമ് ॥ 1 ॥ ഏതാവദേവ ജനനി സ്പൃഹണീയമാസ്തേ ത്വദ്വംദനേഷു സലിലസ്ഥഗിതേ ച നേത്രേ । സാംനിധ്യമുദ്യദരുണായുതസോദരസ്യ ത്വദ്വിഗ്രഹസ്യ പരയാ സുധയാപ്ലുതസ്യ ॥ 2 ॥ ഈശത്വനാമകലുഷാഃ കതി വാ ന സംതി ബ്രഹ്മാദയഃ പ്രതിഭവം പ്രലയാഭിഭൂതാഃ । ഏകഃ സ ഏവ ജനനി സ്ഥിരസിദ്ധിരാസ്തേ യഃ പാദയോസ്തവ സകൃത്പ്രണതിം കരോതി ॥ 3 ॥ ലബ്ധ്വാ സകൃത്ത്രിപുരസുംദരി താവകീനം കാരുണ്യകംദലിതകാംതിഭരം കടാക്ഷമ് । കംദര്പകോടിസുഭഗാസ്ത്വയി ഭക്തിഭാജഃ സംമോഹയംതി തരുണീര്ഭുവനത്രയേഽപി ॥ 4 ॥ ഹ്രീം‍കാരമേവ തവ നാമ ഗൃണംതി വേദാ മാതസ്ത്രികോണനിലയേ ത്രിപുരേ ത്രിനേത്രേ । ത്വത്സംസ്മൃതൌ യമഭടാഭിഭവം വിഹായ ദീവ്യംതി നംദനവനേ സഹ ലോകപാലൈഃ ॥ 5 ॥ ഹംതുഃ പുരാമധിഗലം പരിപീയമാനഃ ക്രൂരഃ കഥം ന ഭവിതാ ഗരലസ്യ വേഗഃ । നാശ്വാസനായ യദി മാതരിദം തവാര്ഥം ദേഹസ്യ ശശ്വദമൃതാപ്ലുതശീതലസ്യ ॥ 6 ॥ സർവജ്ഞതാം സദസി വാക്പടുതാം പ്രസൂതേ ദേവി ത്വദംഘ്രിസരസീരുഹയോഃ പ്രണാമഃ । കിം ച സ്ഫുരന്മകുടമുജ്ജ്വലമാതപത്രം ദ്വേ ചാമരേ ച മഹതീം വസുധാം ദദാതി ॥ 7 ॥ കല്പദ്രുമൈരഭിമതപ്രതിപാദനേഷു കാരുണ്യവാരിധിഭിരംബ ഭവാത്കടാക്ഷൈഃ । ആലോകയ ത്രിപുരസുംദരി മാമനാഥം ത്വയ്യേവ ഭക്തിഭരിതം ത്വയി ബദ്ധതൃഷ്ണമ് ॥ 8 ॥ ഹംതേതരേഷ്വപി മനാംസി നിധായ ചാന്യേ ഭക്തിം വഹംതി കില പാമരദൈവതേഷു । ത്വാമേവ ദേവി മനസാ സമനുസ്മരാമി ത്വാമേവ നൌമി ശരണം ജനനി ത്വമേവ ॥ 9 ॥ ലക്ഷ്യേഷു സത്സ്വപി കടാക്ഷനിരീക്ഷണാനാ- -മാലോകയ ത്രിപുരസുംദരി മാം കദാചിത് । നൂനം മയാ തു സദൃശഃ കരുണൈകപാത്രം ജാതോ ജനിഷ്യതി ജനോ ന ച ജായതേ വാ ॥ 10 ॥ ഹ്രീം ഹ്രീമിതി പ്രതിദിനം ജപതാം തവാഖ്യാം കിം നാമ ദുര്ലഭമിഹ ത്രിപുരാധിവാസേ । മാലാകിരീടമദവാരണമാനനീയാ താന്സേവതേ വസുമതീ സ്വയമേവ ലക്ഷ്മീഃ ॥ 11 ॥ സംപത്കരാണി സകലേംദ്രിയനംദനാനി സാമ്രാജ്യദാനനിരതാനി സരോരുഹാക്ഷി । ത്വദ്വംദനാനി ദുരിതാഹരണോദ്യതാനി മാമേവ മാതരനിശം കലയംതു നാന്യമ് ॥ 12 ॥ കല്പോപസംഹൃതിഷു കല്പിതതാംഡവസ്യ ദേവസ്യ ഖംഡപരശോഃ പരഭൈരവസ്യ । പാശാംകുശൈക്ഷവശരാസനപുഷ്പബാണാ സാ സാക്ഷിണീ വിജയതേ തവ മൂര്തിരേകാ ॥ 13 ॥ ലഗ്നം സദാ ഭവതു മാതരിദം തവാര്ധം തേജഃ പരം ബഹുലകുംകുമപംകശോണമ് । ഭാസ്വത്കിരീടമമൃതാംശുകലാവതംസം മധ്യേ ത്രികോണനിലയം പരമാമൃതാര്ദ്രമ് ॥ 14 ॥ ഹ്രീം‍കാരമേവ തവ നാമ തദേവ രൂപം ത്വന്നാമ ദുര്ലഭമിഹ ത്രിപുരേ ഗൃണംതി । ത്വത്തേജസാ പരിണതം വിയദാദിഭൂതം സൌഖ്യം തനോതി സരസീരുഹസംഭവാദേഃ ॥ 15 ॥ ഹ്രീം‍കാരത്രയസംപുടേന മഹതാ മംത്രേണ സംദീപിതം സ്തോത്രം യഃ പ്രതിവാസരം തവ പുരോ മാതര്ജപേന്മംത്രവിത് । തസ്യ ക്ഷോണിഭുജോ ഭവംതി വശഗാ ലക്ഷ്മീശ്ചിരസ്ഥായിനീ വാണീ നിര്മലസൂക്തിഭാരഭാരിതാ ജാഗര്തി ദീര്ഘം വയഃ ॥ 16 ॥ ഇതി ശ്രീമത്പരമഹംസപരിവ്രാജകാചാര്യസ്യ ശ്രീഗോവിംദഭഗവത്പൂജ്യപാദശിഷ്യസ്യ ശ്രീമച്ഛംകരഭഗവതഃ കൃതൌ കല്യാണവൃഷ്ടി സ്തവഃ ।