യഃ ശ്രീഗോവര്ധനാദ്രിം സകലസുരപതീംസ്തത്രഗോഗോപബൃംദം സ്വീയം സംരക്ഷിതും ചേത്യമരസുഖകരം മോഹയന് സംദധാര । തന്മാനം ഖംഡയിത്വാ വിജിതരിപുകുലോ നീലധാരാധരാഭഃ കൃഷ്ണോ രാധാസമേതോ വിലസതു ഹൃദയേ സോഽസ്മദീയേ സദൈവ ॥ 1 ॥ യം ദൃഷ്ട്വാ കംസഭൂപഃ സ്വകൃതകൃതിമഹോ സംസ്മരന്മംത്രിവര്യാന് കിം വാ പൂർവം മയേദം കൃതമിതി വചനം ദുഃഖിതഃ പ്രത്യുവാച । ആജ്ഞപ്തോ നാരദേന സ്മിതയുതവദനഃ പൂരയന്സർവകാമാന് കൃഷ്ണോ രാധാസമേതോ വിലസതു ഹൃദയേ സോഽസ്മദീയേ സദൈവ ॥ 2 ॥ യേന പ്രോദ്യത്പ്രതാപാ നൃപതികുലഭവാഃ പാംഡവാഃ കൌരവാബ്ധിം തീര്ത്വാ പാരം തദീയം ജഗദഖിലനൃണാം ദുസ്തരംചേതി ജഗ്മുഃ । തത്പത്നീചീരവൃദ്ധിപ്രവിദിതമഹിമാ ഭൂതലേ ഭൂപതീശഃ കൃഷ്ണോ രാധാസമേതോ വിലസതു ഹൃദയേ സോഽസ്മദീയേ സദൈവ ॥ 3 ॥ യസ്മൈ ചോദ്ധൃത്യ പാത്രാദ്ദധിയുതനവനീതം കരൈര്ഗോപികാഭി- ര്ദത്തം തദ്ഭാവപൂര്തൌ വിനിഹിതഹൃദയസ്സത്യമേവം തിരോധാത് । മുക്താഗുംജാവളീഭിഃ പ്രചുരതമരുചിഃ കുംഡലാക്രാംതഗംഡഃ കൃഷ്ണോ രാധാസമേതോ വിലസതു ഹൃദയേ സോഽസ്മദീയേ സദൈവ ॥ 4 ॥ യസ്മാദ്വിശ്വാഭിരാമാദിഹ ജനനവിധൌ സർവനംദാദിഗോപാഃ സംസാരാര്തേർവിമുക്താഃ സകലസുഖകരാഃ സംപദഃ പ്രാപുരേവ । ഇത്ഥം പൂര്ണേംദുവക്ത്രഃ കലകമലദൃശഃ സ്വീയജന്മ സ്തുവംതഃ കൃഷ്ണോ രാധാസമേതോ വിലസതു ഹൃദയേ സോഽസ്മദീയേ സദൈവ ॥ 5 ॥ യസ്യ ശ്രീനംദസൂനോഃ വ്രജയുവതിജനാശ്ചാഗതാ ഭര്തൃപുത്രാം- സ്ത്യക്ത്വാ ശ്രുത്വാ സമീപേ വിചകിതനയനാഃ സപ്രമോദാഃ സ്വഗേഹേ । രംതും രാസാദിലീലാ മനസിജദലിതാ വേണുനാദം ച രമ്യം കൃഷ്ണോ രാധാസമേതോ വിലസതു ഹൃദയേ സോഽസ്മദീയേ സദൈവ ॥ 6 ॥ യസ്മിന് ദൃഷ്ടേ സമസ്തേ ജഗതി യുവതയഃ പ്രാണനാഥവ്രതായാ- സ്താ അപ്യേവം ഹി നൂനം കിമപി ച ഹൃദയേ കാമഭാവം ദധത്യഃ । തത്സ്നേഹാബ്ധിം വപുശ്ചേദവിദിതധരണൌ സൂര്യബിംബസ്വരൂപാഃ കൃഷ്ണോ രാധാസമേതോ വിലസതു ഹൃദയേ സോഽസ്മദീയേ സദൈവ ॥ 7 ॥ യഃ സ്വീയേ ഗോകുലേഽസ്മിന്വിദിതനിജകുലോദ്ഭൂതബാലൈഃ സമേതോ മാതര്യേവം ചകാര പ്രസൃതതമഗുണാന്ബാലലീലാവിലാസാന് । ഹത്വാ വത്സപ്രലംബദ്വിവിദബകഖരാന്ഗോപബൃംദം ജുഗോപ കൃഷ്ണോ രാധാസമേതോ വിലസതു ഹൃദയേ സോഽസ്മദീയേ സദൈവ ॥ 8 ॥ കൃഷ്ണാരാധാഷ്ടകം പ്രാതരുത്ഥായ പ്രപഠേന്നരഃ । യ ഏവം സർവദാ നൂനം സ പ്രാപ്നോതി പരാം ഗതിമ് ॥ 9 ॥ ഇതി ശ്രീരഘുനാഥചാര്യ വിരചിതം ശ്രീരാധാകൃഷ്ണാഷ്ടകമ് ।