ഓം അസ്യ ശ്രീകൃഷ്ണസഹസ്രനാമസ്തോത്രമംത്രസ്യ പരാശര ഋഷിഃ, അനുഷ്ടുപ് ഛംദഃ, ശ്രീകൃഷ്ണഃ പരമാത്മാ ദേവതാ, ശ്രീകൃഷ്ണേതി ബീജമ്, ശ്രീവല്ലഭേതി ശക്തിഃ, ശാരംഗീതി കീലകം, ശ്രീകൃഷ്ണപ്രീത്യര്ഥേ ജപേ വിനിയോഗഃ ॥ ന്യാസഃ പരാശരായ ഋഷയേ നമഃ ഇതി ശിരസി, അനുഷ്ടുപ് ഛംദസേ നമഃ ഇതി മുഖേ, ഗോപാലകൃഷ്ണദേവതായൈ നമഃ ഇതി ഹൃദയേ, ശ്രീകൃഷ്ണായ ബീജായ നമഃ ഇതി ഗുഹ്യേ, ശ്രീവല്ലഭായ ശക്ത്യൈ നമഃ ഇതി പാദയോഃ, ശാര്ങ്ഗധരായ കീലകായ നമഃ ഇതി സർവാംഗേ ॥ കരന്യാസഃ ശ്രീകൃഷ്ണ ഇത്യാരഭ്യ ശൂരവംശൈകധീരിത്യംതാനി അംഗുഷ്ഠാഭ്യാം നമഃ । ശൌരിരിത്യാരഭ്യ സ്വഭാസോദ്ഭാസിതവ്രജ ഇത്യംതാനി തര്ജനീഭ്യാം നമഃ । കൃതാത്മവിദ്യാവിന്യാസ ഇത്യാരഭ്യ പ്രസ്ഥാനശകടാരൂഢ ഇതി മധ്യമാഭ്യാം നമഃ, ബൃംദാവനകൃതാലയ ഇത്യാരഭ്യ മധുരാജനവീക്ഷിത ഇത്യനാമികാഭ്യാം നമഃ, രജകപ്രതിഘാതക ഇത്യാരഭ്യ ദ്വാരകാപുരകല്പന ഇതി കനിഷ്ഠികാഭ്യാം നമഃ ദ്വാരകാനിലയ ഇത്യാരഭ്യ പരാശര ഇതി കരതലകരപൃഷ്ഠാഭ്യാം നമഃ, ഏവം ഹൃദയാദിന്യാസഃ ॥ ധ്യാനമ് കേഷാംചിത്പ്രേമപുംസാം വിഗലിതമനസാം ബാലലീലാവിലാസം കേഷാം ഗോപാലലീലാംകിതരസികതനുർവേണുവാദ്യേന ദേവമ് । കേഷാം വാമാസമാജേ ജനിതമനസിജോ ദൈത്യദര്പാപഹൈവം ജ്ഞാത്വാ ഭിന്നാഭിലാഷം സ ജയതി ജഗതാമീശ്വരസ്താദൃശോഽഭൂത് ॥ 1 ॥ ക്ഷീരാബ്ധൌ കൃതസംസ്തവസ്സുരഗണൈര്ബ്രഹ്മാദിഭിഃ പംഡിതൈഃ പ്രോദ്ഭൂതോ വസുദേവസദ്മനി മുദാ ചിക്രീഡ യോ ഗോകുലേ । കംസധ്വംസകൃതേ ജഗാമ മധുരാം സാരാമസദ്വാരകാം ഗോപാലോഽഖിലഗോപികാജനസഖഃ പായാദപായാത് സ നഃ ॥ 2 ॥ ഫുല്ലേംദീവരകാംതിമിംദുവദനം ബര്ഹാവതംസപ്രിയം ശ്രീവത്സാംകമുദാരകൌസ്തുഭധരം പീതാംബരം സുംദരമ് । ഗോപീനാം നയനോത്പലാര്ചിതതനും ഗോഗോപസംഘാവൃതം ഗോവിംദം കലവേണുവാദനരതം ദിവ്യാംഗഭൂഷം ഭജേ ॥ 3 ॥ ഓമ് । കൃഷ്ണഃ ശ്രീവല്ലഭഃ ശാരംഗീ വിഷ്വക്സേനഃ സ്വസിദ്ധിദഃ । ക്ഷീരോദധാമാ വ്യൂഹേശഃ ശേഷശായീ ജഗന്മയഃ ॥ 1 ॥ ഭക്തിഗമ്യസ്ത്രയീമൂര്തിര്ഭാരാര്തവസുധാസ്തുതഃ । ദേവദേവോ ദയാസിംധുര്ദേവദേവശിഖാമണിഃ ॥ 2 ॥ സുഖഭാവസ്സുഖാധാരോ മുകുംദോ മുദിതാശയഃ । അവിക്രിയഃ ക്രിയാമൂര്തിരധ്യാത്മസ്വസ്വരൂപവാന് ॥ 3 ॥ ശിഷ്ടാഭിലക്ഷ്യോ ഭൂതാത്മാ ധര്മത്രാണാര്ഥചേഷ്ടിതഃ । അംതര്യാമീ കലാരൂപഃ കാലാവയവസാക്ഷികഃ ॥ 4 ॥ വസുധായാസഹരണോ നാരദപ്രേരണോന്മുഖഃ । പ്രഭൂഷ്ണുര്നാരദോദ്ഗീതോ ലോകരക്ഷാപരായണഃ ॥ 5 ॥ രൌഹിണേയകൃതാനംദോ യോഗജ്ഞാനനിയോജകഃ । മഹാഗുഹാംതര്നിക്ഷിപ്തഃ പുരാണവപുരാത്മവാന് ॥ 6 ॥ ശൂരവംശൈകധീശ്ശൌരിഃ കംസശംകാവിഷാദകൃത് । വസുദേവോല്ലസച്ഛക്തിര്ദേവക്യഷ്ടമഗര്ഭഗഃ ॥ 7 ॥ വസുദേവസുതഃ ശ്രീമാംദേവകീനംദനോ ഹരിഃ । ആശ്ചര്യബാലഃ ശ്രീവത്സലക്ഷ്മവക്ഷാശ്ചതുര്ഭുജഃ ॥ 8 ॥ സ്വഭാവോത്കൃഷ്ടസദ്ഭാവഃ കൃഷ്ണാഷ്ടമ്യംതസംഭവഃ । പ്രാജാപത്യര്ക്ഷസംഭൂതോ നിശീഥസമയോദിതഃ ॥ 9 ॥ ശംഖചക്രഗദാപദ്മപാണിഃ പദ്മനിഭേക്ഷണഃ । കിരീടീ കൌസ്തുഭോരസ്കഃ സ്ഫുരന്മകരകുംഡലഃ ॥ 10 ॥ പീതവാസാ ഘനശ്യാമഃ കുംചിതാംചിതകുംതലഃ । സുവ്യക്തവ്യക്താഭരണഃ സൂതികാഗൃഹഭൂഷണഃ ॥ 11 ॥ കാരാഗാരാംധകാരഘ്നഃ പിതൃപ്രാഗ്ജന്മസൂചകഃ । വസുദേവസ്തുതഃ സ്തോത്രം താപത്രയനിവാരണഃ ॥ 12 ॥ നിരവദ്യഃ ക്രിയാമൂര്തിര്ന്യായവാക്യനിയോജകഃ । അദൃഷ്ടചേഷ്ടഃ കൂടസ്ഥോ ധൃതലൌകികവിഗ്രഹഃ ॥ 13 ॥ മഹര്ഷിമാനസോല്ലാസോ മഹീമംഗലദായകഃ । സംതോഷിതസുരവ്രാതഃ സാധുചിത്തപ്രസാദകഃ ॥ 14 ॥ ജനകോപായനിര്ദേഷ്ടാ ദേവകീനയനോത്സവഃ । പിതൃപാണിപരിഷ്കാരോ മോഹിതാഗാരരക്ഷകഃ ॥ 15 ॥ സ്വശക്ത്യുദ്ധാടിതാശേഷകപാടഃ പിതൃവാഹകഃ । ശേഷോരഗഫണാച്ഛത്രശ്ശേഷോക്താഖ്യാസഹസ്രകഃ ॥ 16 ॥ യമുനാപൂരവിധ്വംസീ സ്വഭാസോദ്ഭാസിതവ്രജഃ । കൃതാത്മവിദ്യാവിന്യാസോ യോഗമായാഗ്രസംഭവഃ ॥ 17 ॥ ദുര്ഗാനിവേദിതോദ്ഭാവോ യശോദാതല്പശായകഃ । നംദഗോപോത്സവസ്ഫൂര്തിർവ്രജാനംദകരോദയഃ ॥ 18 ॥ സുജാതജാതകര്മ ശ്രീര്ഗോപീഭദ്രോക്തിനിർവൃതഃ । അലീകനിദ്രോപഗമഃ പൂതനാസ്തനപീഡനഃ ॥ 19 ॥ സ്തന്യാത്തപൂതനാപ്രാണഃ പൂതനാക്രോശകാരകഃ । വിന്യസ്തരക്ഷാഗോധൂലിര്യശോദാകരലാലിതഃ ॥ 20 ॥ നംദാഘ്രാതശിരോമധ്യഃ പൂതനാസുഗതിപ്രദഃ । ബാലഃ പര്യംകനിദ്രാലുര്മുഖാര്പിതപദാംഗുലിഃ ॥ 21 ॥ അംജനസ്നിഗ്ധനയനഃ പര്യായാംകുരിതസ്മിതഃ । ലീലാക്ഷസ്തരലാലോകശ്ശകടാസുരഭംജനഃ ॥ 22 ॥ ദ്വിജോദിതസ്വസ്ത്യയനോ മംത്രപൂതജലാപ്ലുതഃ । യശോദോത്സംഗപര്യംകോ യശോദാമുഖവീക്ഷകഃ ॥ 23 ॥ യശോദാസ്തന്യമുദിതസ്തൃണാവര്താദിദുസ്സഹഃ । തൃണാവര്താസുരധ്വംസീ മാതൃവിസ്മയകാരകഃ ॥ 24 ॥ പ്രശസ്തനാമകരണോ ജാനുചംക്രമണോത്സുകഃ । വ്യാലംബിചൂലികാരത്നോ ഘോഷഗോപപ്രഹര്ഷണഃ ॥ 25 ॥ സ്വമുഖപ്രതിബിംബാര്ഥീ ഗ്രീവാവ്യാഘ്രനഖോജ്ജ്വലഃ । പംകാനുലേപരുചിരോ മാംസലോരുകടീതടഃ ॥ 26 ॥ ഘൃഷ്ടജാനുകരദ്വംദ്വഃ പ്രതിബിംബാനുകാരകൃത് । അവ്യക്തവര്ണവാഗ്വൃത്തിഃ സ്മിതലക്ഷ്യരദോദ്ഗമഃ ॥ 27 ॥ ധാത്രീകരസമാലംബീ പ്രസ്ഖലച്ചിത്രചംക്രമഃ । അനുരൂപവയസ്യാഢ്യശ്ചാരുകൌമാരചാപലഃ ॥ 28 ॥ വത്സപുച്ഛസമാകൃഷ്ടോ വത്സപുച്ഛവികര്ഷണഃ । വിസ്മാരിതാന്യവ്യാപാരോ ഗോപഗോപീമുദാവഹഃ ॥ 29 ॥ അകാലവത്സനിര്മോക്താ വ്രജവ്യാക്രോശസുസ്മിതഃ । നവനീതമഹാചോരോ ദാരകാഹാരദായകഃ ॥ 30 ॥ പീഠോലൂഖലസോപാനഃ ക്ഷീരഭാംഡവിഭേദനഃ । ശിക്യഭാംഡസമാകര്ഷീ ധ്വാംതാഗാരപ്രവേശകൃത് ॥ 31 ॥ ഭൂഷാരത്നപ്രകാശാഢ്യോ ഗോപ്യുപാലംഭഭര്ത്സിതഃ । പരാഗധൂസരാകാരോ മൃദ്ഭക്ഷണകൃതേക്ഷണഃ ॥ 32 ॥ ബാലോക്തമൃത്കഥാരംഭോ മിത്രാംതര്ഗൂഢവിഗ്രഹഃ । കൃതസംത്രാസലോലാക്ഷോ ജനനീപ്രത്യയാവഹഃ ॥ 33॥ മാതൃദൃശ്യാത്തവദനോ വക്ത്രലക്ഷ്യചരാചരഃ । യശോദാലാലിതസ്വാത്മാ സ്വയം സ്വാച്ഛംദ്യമോഹനഃ ॥ 34 ॥ സവിത്രീസ്നേഹസംശ്ലിഷ്ടഃ സവിത്രീസ്തനലോലുപഃ । നവനീതാര്ഥനാപ്രഹ്വോ നവനീതമഹാശനഃ ॥ 35 ॥ മൃഷാകോപപ്രകംപോഷ്ഠോ ഗോഷ്ഠാംഗണവിലോകനഃ । ദധിമംഥഘടീഭേത്താ കിംകിണീക്വാണസൂചിതഃ ॥ 36 ॥ ഹൈയംഗവീനരസികോ മൃഷാശ്രുശ്ചൌര്യശംകിതഃ । ജനനീശ്രമവിജ്ഞാതാ ദാമബംധനിയംത്രിതഃ ॥ 37 ॥ ദാമാകല്പശ്ചലാപാംഗോ ഗാഢോലൂഖലബംധനഃ । ആകൃഷ്ടോലൂഖലോഽനംതഃ കുബേരസുതശാപവിത് ॥ । 38 ॥ നാരദോക്തിപരാമര്ശീ യമലാര്ജുനഭംജനഃ । ധനദാത്മജസംഘുഷ്ടോ നംദമോചിതബംധനഃ ॥ 39 ॥ ബാലകോദ്ഗീതനിരതോ ബാഹുക്ഷേപോദിതപ്രിയഃ । ആത്മജ്ഞോ മിത്രവശഗോ ഗോപീഗീതഗുണോദയഃ ॥ 40 ॥ പ്രസ്ഥാനശകടാരൂഢോ ബൃംദാവനകൃതാലയഃ । ഗോവത്സപാലനൈകാഗ്രോ നാനാക്രീഡാപരിച്ഛദഃ ॥ 41 ॥ ക്ഷേപണീക്ഷേപണപ്രീതോ വേണുവാദ്യവിശാരദഃ । വൃഷവത്സാനുകരണോ വൃഷധ്വാനവിഡംബനഃ ॥ 42 ॥ നിയുദ്ധലീലാസംഹൃഷ്ടഃ കൂജാനുകൃതകോകിലഃ । ഉപാത്തഹംസഗമനസ്സർവജംതുരുതാനുകൃത് ॥ 43 ॥ ഭൃംഗാനുകാരീ ദധ്യന്നചോരോ വത്സപുരസ്സരഃ । ബലീ ബകാസുരഗ്രാഹീ ബകതാലുപ്രദാഹകഃ ॥ 44 ॥ ഭീതഗോപാര്ഭകാഹൂതോ ബകചംചുവിദാരണഃ । ബകാസുരാരിര്ഗോപാലോ ബാലോ ബാലാദ്ഭുതാവഹഃ ॥ 45 ॥ ബലഭദ്രസമാശ്ലിഷ്ടഃ കൃതക്രീഡാനിലായനഃ । ക്രീഡാസേതുനിധാനജ്ഞഃ പ്ലവംഗോത്പ്ലവനോഽദ്ഭുതഃ ॥ 46 ॥ കംദുകക്രീഡനോ ലുപ്തനംദാദിഭവവേദനഃ । സുമനോഽലംകൃതശിരാഃ സ്വാദുസ്നിഗ്ധാന്നശിക്യഭൃത് ॥ 47 ॥ ഗുംജാപ്രാലംബനച്ഛന്നഃ പിംഛൈരലകവേഷകൃത് । വന്യാശനപ്രിയഃ ശൃംഗരവാകാരിതവത്സകഃ ॥ 48 ॥ മനോജ്ഞപല്ലവോത്തംസപുഷ്പസ്വേച്ഛാത്തഷട്പദഃ । മംജുശിംജിതമംജീരചരണഃ കരകംകണഃ ॥ 49 ॥ അന്യോന്യശാസനഃ ക്രീഡാപടുഃ പരമകൈതവഃ । പ്രതിധ്വാനപ്രമുദിതഃ ശാഖാചതുരചംക്രമഃ ॥ 50 ॥ അഘദാനവസംഹര്താ വ്രജവിഘ്നവിനാശനഃ । വ്രജസംജീവനഃ ശ്രേയോനിധിര്ദാനവമുക്തിദഃ ॥ 51 ॥ കാലിംദീപുലിനാസീനസ്സഹഭുക്തവ്രജാര്ഭകഃ । കക്ഷാജഠരവിന്യസ്തവേണുർവല്ലവചേഷ്ടിതഃ ॥ 52 ॥ ഭുജസംധ്യംതരന്യസ്തശൃംഗവേത്രഃ ശുചിസ്മിതഃ । വാമപാണിസ്ഥദധ്യന്നകബലഃ കലഭാഷണഃ ॥ 53 ॥ അംഗുല്യംതരവിന്യസ്തഫലഃ പരമപാവനഃ । അദൃശ്യതര്ണകാന്വേഷീ വല്ലവാര്ഭകഭീതിഹാ ॥ 54 ॥ അദൃഷ്ടവത്സപവ്രാതോ ബ്രഹ്മവിജ്ഞാതവൈഭവഃ । ഗോവത്സവത്സപാന്വേഷീ വിരാട്-പുരുഷവിഗ്രഹഃ ॥ 55 ॥ സ്വസംകല്പാനുരൂപാര്ഥോ വത്സവത്സപരൂപധൃക് । യഥാവത്സക്രിയാരൂപോ യഥാസ്ഥാനനിവേശനഃ ॥ 56 ॥ യഥാവ്രജാര്ഭകാകാരോ ഗോഗോപീസ്തന്യപസ്സുഖീ । ചിരാദ്വലോഹിതോ ദാംതോ ബ്രഹ്മവിജ്ഞാതവൈഭവഃ ॥ 57 ॥ വിചിത്രശക്തിർവ്യാലീനസൃഷ്ടഗോവത്സവത്സപഃ । ബ്രഹ്മത്രപാകരോ ധാതൃസ്തുതസ്സർവാര്ഥസാധകഃ ॥ 58 ॥ ബ്രഹ്മ ബ്രഹ്മമയോഽവ്യക്തസ്തേജോരൂപസ്സുഖാത്മകഃ । നിരുക്തം വ്യാകൃതിർവ്യക്തോ നിരാലംബനഭാവനഃ ॥ 59 ॥ പ്രഭവിഷ്ണുരതംത്രീകോ ദേവപക്ഷാര്ഥരൂപധൃക് । അകാമസ്സർവവേദാദിരണീയസ്ഥൂലരൂപവാന് ॥ 60 ॥ വ്യാപീ വ്യാപ്യഃ കൃപാകര്താ വിചിത്രാചാരസമ്മതഃ । ഛംദോമയഃ പ്രധാനാത്മാ മൂര്താമൂര്തിദ്വയാകൃതിഃ ॥ 61 ॥ അനേകമൂര്തിരക്രോധഃ പരഃ പ്രകൃതിരക്രമഃ । സകലാവരണോപേതസ്സർവദേവോ മഹേശ്വരഃ ॥ 62 ॥ മഹാപ്രഭാവനഃ പൂർവവത്സവത്സപദര്ശകഃ । കൃഷ്ണയാദവഗോപാലോ ഗോപാലോകനഹര്ഷിതഃ ॥ 63 ॥ സ്മിതേക്ഷാഹര്ഷിതബ്രഹ്മാ ഭക്തവത്സലവാക്പ്രിയഃ । ബ്രഹ്മാനംദാശ്രുധൌതാംഘ്രിര്ലീലാവൈചിത്ര്യകോവിദഃ ॥ 64 ॥ ബലഭദ്രൈകഹൃദയോ നാമാകാരിതഗോകുലഃ । ഗോപാലബാലകോ ഭവ്യോ രജ്ജുയജ്ഞോപവീതവാന് ॥ 65 ॥ വൃക്ഷച്ഛായാഹതാശാംതിര്ഗോപോത്സംഗോപബര്ഹണഃ । ഗോപസംവാഹിതപദോ ഗോപവ്യജനവീജിതഃ ॥ 66। ഗോപഗാനസുഖോന്നിദ്രഃ ശ്രീദാമാര്ജിതസൌഹൃദഃ । സുനംദസുഹൃദേകാത്മാ സുബലപ്രാണരംജനഃ ॥ 67 ॥ താലീവനകൃതക്രീഡോ ബലപാതിതധേനുകഃ । ഗോപീസൌഭാഗ്യസംഭാവ്യോ ഗോധൂലിച്ഛുരിതാലകഃ ॥ 68 ॥ ഗോപീവിരഹസംതപ്തോ ഗോപികാകൃതമജ്ജനഃ । പ്രലംബബാഹുരുത്ഫുല്ലപുംഡരീകാവതംസകഃ ॥ 69 ॥ വിലാസലലിതസ്മേരഗര്ഭലീലാവലോകനഃ । സ്രഗ്ഭൂഷണാനുലേപാഢ്യോ ജനന്യുപഹൃതാന്നഭുക് ॥ 70 ॥ വരശയ്യാശയോ രാധാപ്രേമസല്ലാപനിർവൃതഃ । യമുനാതടസംചാരീ വിഷാര്തവ്രജഹര്ഷദഃ ॥ 71 ॥ കാലിയക്രോധജനകഃ വൃദ്ധാഹികുലവേഷ്ടിതഃ । കാലിയാഹിഫണാരംഗനടഃ കാലിയമര്ദനഃ ॥ 72 ॥ നാഗപത്നീസ്തുതിപ്രീതോ നാനാവേഷസമൃദ്ധികൃത് । അവിഷ്വക്തദൃഗാത്മേശഃ സ്വദൃഗാത്മസ്തുതിപ്രിയഃ ॥ 73 ॥ സർവേശ്വരസ്സർവഗുണഃ പ്രസിദ്ധസ്സർവസാത്വതഃ । അകുംഠധാമാ ചംദ്രാര്കദൃഷ്ടിരാകാശനിര്മലഃ ॥ 74 ॥ അനിര്ദേശ്യഗതിര്നാഗവനിതാപതിഭൈക്ഷദഃ । സ്വാംഘ്രിമുദ്രാംകനാഗേംദ്രമൂര്ധാ കാലിയസംസ്തുതഃ ॥ 75 ॥ അഭയോ വിശ്വതശ്ചക്ഷുഃ സ്തുതോത്തമഗുണഃ പ്രഭുഃ । അഹമാത്മാ മരുത്പ്രാണഃ പരമാത്മാ ദ്യുശീര്ഷവാന് ॥ 76 ॥ നാഗോപായനഹൃഷ്ടാത്മാ ഹ്രദോത്സാരിതകാലിയഃ । ബലഭദ്രസുഖാലാപോ ഗോപാലിംഗനനിർവൃതഃ ॥ 77 ॥ ദാവാഗ്നിഭീതഗോപാലഗോപ്താ ദാവാഗ്നിനാശനഃ । നയനാച്ഛാദനക്രീഡാലംപടോ നൃപചേഷ്ടിതഃ ॥ 78 ॥ കാകപക്ഷധരസ്സൌമ്യോ ബലവാഹകകേലിമാന് । ബലഘാതിതദുര്ധര്ഷപ്രലംബോ ബലവത്സലഃ ॥ 79 ॥ മുംജാടവ്യഗ്നിശമനഃ പ്രാവൃട്കാലവിനോദവാന് । ശിലാന്യസ്താന്നഭൃദ്ദൈത്യസംഹര്താ ശാദ്വലാസനഃ ॥ 80 ॥ സദാപ്തഗോപികോദ്ഗീതഃ കര്ണികാരാവതംസകഃ । നടവേഷധരഃ പദ്മമാലാംകോ ഗോപികാവൃതഃ ॥ 81 ॥ ഗോപീമനോഹരാപാംഗോ വേണുവാദനതത്പരഃ । വിന്യസ്തവദനാംഭോജശ്ചാരുശബ്ദകൃതാനനഃ ॥ 82 ॥ ബിംബാധരാര്പിതോദാരവേണുർവിശ്വവിമോഹനഃ । വ്രജസംവര്ണിതശ്രാവ്യവേണുനാദഃ ശ്രുതിപ്രിയഃ ॥ 83 ॥ ഗോഗോപഗോപീജന്മേപ്സുര്ബ്രഹ്മേംദ്രാദ്യഭിവംദിതഃ । ഗീതസ്നുതിസരിത്പൂരോ നാദനര്തിതബര്ഹിണഃ ॥ 84 ॥ രാഗപല്ലവിതസ്ഥാണുര്ഗീതാനമിതപാദപഃ । വിസ്മാരിതതൃണഗ്രാസമൃഗോ മൃഗവിലോഭിതഃ ॥ 85 ॥ വ്യാഘ്രാദിഹിംസ്രസഹജവൈരഹര്താ സുഗായനഃ । ഗാഢോദീരിതഗോബൃംദപ്രേമോത്കര്ണിതതര്ണകഃ ॥ 86 ॥ നിഷ്പംദയാനബ്രഹ്മാദിവീക്ഷിതോ വിശ്വവംദിതഃ । ശാഖോത്കര്ണശകുംതൌഘശ്ഛത്രായിതബലാഹകഃ ॥ 87 ॥ പ്രസന്നഃ പരമാനംദശ്ചിത്രായിതചരാചരഃ । ഗോപികാമദനോ ഗോപീകുചകുംകുമമുദ്രിതഃ ॥ 88 ॥ ഗോപികന്യാജലക്രീഡാഹൃഷ്ടോ ഗോപ്യംശുകാപഹൃത് । സ്കംധാരോപിതഗോപസ്ത്രീവാസാഃ കുംദനിഭസ്മിതഃ ॥ 89 ॥ ഗോപീനേത്രോത്പലശശീ ഗോപികായാചിതാംശുകഃ । ഗോപീനമസ്ക്രിയാദേഷ്ടാ ഗോപ്യേകകരവംദിതഃ ॥ 90 ॥ ഗോപ്യംജലിവിശേഷാര്ഥീ ഗോപക്രീഡാവിലോഭിതഃ । ശാംതവാസസ്ഫുരദ്ഗോപീകൃതാംജലിരഘാപഹഃ ॥ 91 ॥ ഗോപീകേലിവിലാസാര്ഥീ ഗോപീസംപൂര്ണകാമദഃ । ഗോപസ്ത്രീവസ്ത്രദോ ഗോപീചിത്തചോരഃ കുതൂഹലീ ॥ 92 ॥ ബൃംദാവനപ്രിയോ ഗോപബംധുര്യജ്വാന്നയാചിതാ । യജ്ഞേശോ യജ്ഞഭാവജ്ഞോ യജ്ഞപത്ന്യഭിവാംഛിതഃ ॥ 93 ॥ മുനിപത്നീവിതീര്ണാന്നതൃപ്തോ മുനിവധൂപ്രിയഃ । ദ്വിജപത്ന്യഭിഭാവജ്ഞോ ദ്വിജപത്നീവരപ്രദഃ ॥ 94 ॥ പ്രതിരുദ്ധസതീമോക്ഷപ്രദോ ദ്വിജവിമോഹിതാ । മുനിജ്ഞാനപ്രദോ യജ്വസ്തുതോ വാസവയാഗവിത് ॥ 95 ॥ പിതൃപ്രോക്തക്രിയാരൂപശക്രയാഗനിവാരണഃ । ശക്രാഽമര്ഷകരശ്ശക്രവൃഷ്ടിപ്രശമനോന്മുഖഃ ॥ 96 ॥ ഗോവര്ധനധരോ ഗോപഗോബൃംദത്രാണതത്പരഃ । ഗോവര്ധനഗിരിച്ഛത്രചംഡദംഡഭുജാര്ഗലഃ ॥ 97 ॥ സപ്താഹവിധൃതാദ്രീംദ്രോ മേഘവാഹനഗർവഹാ । ഭുജാഗ്രോപരിവിന്യസ്തക്ഷ്മാധരക്ഷ്മാഭൃദച്യുതഃ ॥ 98 ॥ സ്വസ്ഥാനസ്ഥാപിതഗിരിര്ഗോപീദധ്യക്ഷതാര്ചിതഃ । സുമനസ്സുമനോവൃഷ്ടിഹൃഷ്ടോ വാസവവംദിതഃ ॥ 99 ॥ കാമധേനുപയഃപൂരാഭിഷിക്തസ്സുരഭിസ്തുതഃ । ധരാംഘ്രിരോഷധീരോമാ ധര്മഗോപ്താ മനോമയഃ ॥ 100 ॥ ജ്ഞാനയജ്ഞപ്രിയശ്ശാസ്ത്രനേത്രസ്സർവാര്ഥസാരഥിഃ । ഐരാവതകരാനീതവിയദ്ഗംഗാപ്ലുതോ വിഭുഃ ॥ 101 ॥ ബ്രഹ്മാഭിഷിക്തോ ഗോഗോപ്താ സർവലോകശുഭംകരഃ । സർവവേദമയോ മഗ്നനംദാന്വേഷിപിതൃപ്രിയഃ ॥ 102 ॥ വരുണോദീരിതാത്മേക്ഷാകൌതുകോ വരുണാര്ചിതഃ । വരുണാനീതജനകോ ഗോപജ്ഞാതാത്മവൈഭവഃ ॥ 103 ॥ സ്വര്ലോകാലോകസംഹൃഷ്ടഗോപവര്ഗത്രിവര്ഗദഃ । ബ്രഹ്മഹൃദ്ഗോപിതോ ഗോപദ്രഷ്ടാ ബ്രഹ്മപദപ്രദഃ ॥ 104 ॥ ശരച്ചംദ്രവിഹാരോത്കഃ ശ്രീപതിർവശകോ ക്ഷമഃ । ഭയാപഹോ ഭര്തൃരുദ്ധഗോപികാധ്യാനഗോചരഃ ॥ 105 ॥ ഗോപികാനയനാസ്വാദ്യോ ഗോപീനര്മോക്തിനിർവൃതഃ । ഗോപികാമാനഹരണോ ഗോപികാശതയൂഥപഃ ॥ 106 ॥ വൈജയംതീസ്രഗാകല്പോ ഗോപികാമാനവര്ധനഃ । ഗോപകാംതാസുനിര്ദേഷ്ടാ കാംതോ മന്മഥമന്മഥഃ ॥ 107 ॥ സ്വാത്മാസ്യദത്തതാംബൂലഃ ഫലിതോത്കൃഷ്ടയൌവനഃ । വല്ലവീസ്തനസക്താക്ഷോ വല്ലവീപ്രേമചാലിതഃ ॥ 108 ॥ ഗോപീചേലാംചലാസീനോ ഗോപീനേത്രാബ്ജഷട്പദഃ । രാസക്രീഡാസമാസക്തോ ഗോപീമംഡലമംഡനഃ ॥ 109 ॥ ഗോപീഹേമമണിശ്രേണിമധ്യേംദ്രമണിരുജ്ജ്വലഃ । വിദ്യാധരേംദുശാപഘ്നശ്ശംഖചൂഡശിരോഹരഃ ॥ 110 ॥ ശംഖചൂഡശിരോരത്നസംപ്രീണിതബലോഽനഘഃ । അരിഷ്ടാരിഷ്ടകൃദ്ദുഷ്ടകേശിദൈത്യനിഷൂദനഃ ॥ 111 ॥ സരസസ്സസ്മിതമുഖസ്സുസ്ഥിരോ വിരഹാകുലഃ । സംകര്ഷണാര്പിതപ്രീതിരക്രൂരധ്യാനഗോചരഃ ॥ 112 ॥ അക്രൂരസംസ്തുതോ ഗൂഢോ ഗുണവൃത്യുപലക്ഷിതഃ । പ്രമാണഗമ്യസ്തന്മാത്രാഽവയവീ ബുദ്ധിതത്പരഃ ॥ 113 ॥ സർവപ്രമാണപ്രമധീസ്സർവപ്രത്യയസാധകഃ । പുരുഷശ്ച പ്രധാനാത്മാ വിപര്യാസവിലോചനഃ ॥ 114 ॥ മധുരാജനസംവീക്ഷ്യോ രജകപ്രതിഘാതകഃ । വിചിത്രാംബരസംവീതോ മാലാകാരവരപ്രദഃ ॥ 115 ॥ കുബ്ജാവക്രത്വനിര്മോക്താ കുബ്ജായൌവനദായകഃ । കുബ്ജാംഗരാഗസുരഭിഃ കംസകോദംഡഖംഡനഃ ॥ 116 ॥ ധീരഃ കുവലയാപീഡമര്ദനഃ കംസഭീതികൃത് । ദംതിദംതായുധോ രംഗത്രാസകോ മല്ലയുദ്ധവിത് ॥ 117 ॥ ചാണൂരഹംതാ കംസാരിര്ദേവകീഹര്ഷദായകഃ । വസുദേവപദാനമ്രഃ പിതൃബംധവിമോചനഃ ॥ 118 ॥ ഉർവീഭയാപഹോ ഭൂപ ഉഗ്രസേനാധിപത്യദഃ । ആജ്ഞാസ്ഥിതശചീനാഥസ്സുധര്മാനയനക്ഷമഃ ॥ 119 ॥ ആദ്യോ ദ്വിജാതിസത്കര്താ ശിഷ്ടാചാരപ്രദര്ശകഃ । സാംദീപനികൃതാഭ്യസ്തവിദ്യാഭ്യാസൈകധീസ്സുധീഃ ॥ 120 ॥ ഗുർവഭീഷ്ടക്രിയാദക്ഷഃ പശ്ചിമോദധിപൂജിതഃ । ഹതപംചജനപ്രാപ്തപാംചജന്യോ യമാര്ചിതഃ ॥ 121 ॥ ധര്മരാജജയാനീതഗുരുപുത്ര ഉരുക്രമഃ । ഗുരുപുത്രപ്രദശ്ശാസ്താ മധുരാജസഭാസദഃ ॥ 122 ॥ ജാമദഗ്ന്യസമഭ്യര്ച്യോ ഗോമംതഗിരിസംചരഃ । ഗോമംതദാവശമനോ ഗരുഡാനീതഭൂഷണഃ ॥ 123 ॥ ചക്രാദ്യായുധസംശോഭീ ജരാസംധമദാപഹഃ । സൃഗാലാവനിപാലഘ്നസ്സൃഗാലാത്മജരാജ്യദഃ ॥ 124 ॥ വിധ്വസ്തകാലയവനോ മുചുകുംദവരപ്രദഃ । ആജ്ഞാപിതമഹാംഭോധിര്ദ്വാരകാപുരകല്പനഃ ॥ 125 ॥ ദ്വാരകാനിലയോ രുക്മിമാനഹംതാ യദൂദ്വഹഃ । രുചിരോ രുക്മിണീജാനിഃ പ്രദ്യുമ്നജനകഃ പ്രഭുഃ ॥ 126 ॥ അപാകൃതത്രിലോകാര്തിരനിരുദ്ധപിതാമഹഃ । അനിരുദ്ധപദാന്വേഷീ ചക്രീ ഗരുഡവാഹനഃ ॥ 127 ॥ ബാണാസുരപുരീരോദ്ധാ രക്ഷാജ്വലനയംത്രജിത് । ധൂതപ്രമഥസംരംഭോ ജിതമാഹേശ്വരജ്വരഃ ॥ 128 ॥ ഷട്ചക്രശക്തിനിര്ജേതാ ഭൂതവേതാലമോഹകൃത് । ശംഭുത്രിശൂലജിച്ഛംഭുജൃംഭണശ്ശംഭുസംസ്തുതഃ ॥ 129 ॥ ഇംദ്രിയാത്മേംദുഹൃദയസ്സർവയോഗേശ്വരേശ്വരഃ । ഹിരണ്യഗര്ഭഹൃദയോ മോഹാവര്തനിവര്തനഃ ॥ 130 ॥ ആത്മജ്ഞാനനിധിര്മേധാ കോശസ്തന്മാത്രരൂപവാന് । ഇംദ്രോഽഗ്നിവദനഃ കാലനാഭസ്സർവാഗമാധ്വഗഃ ॥ 131 ॥ തുരീയസർവധീസാക്ഷീ ദ്വംദ്വാരാമാത്മദൂരഗഃ । അജ്ഞാതപാരോ വശ്യശ്രീരവ്യാകൃതവിഹാരവാന് ॥ 132 ॥ ആത്മപ്രദീപോ വിജ്ഞാനമാത്രാത്മാ ശ്രീനികേതനഃ । ബാണബാഹുവനച്ഛേത്താ മഹേംദ്രപ്രീതിവര്ധനഃ ॥ 133 ॥ അനിരുദ്ധനിരോധജ്ഞോ ജലേശാഹൃതഗോകുലഃ । ജലേശവിജയീ വീരസ്സത്രാജിദ്രത്നയാചകഃ ॥ 134 ॥ പ്രസേനാന്വേഷണോദ്യുക്തോ ജാംബവദ്ധൃതരത്നദഃ । ജിതര്ക്ഷരാജതനയാഹര്താ ജാംബവതീപ്രിയഃ ॥ 135 ॥ സത്യഭാമാപ്രിയഃ കാമശ്ശതധന്വശിരോഹരഃ । കാലിംദീപതിരക്രൂരബംധുരക്രൂരരത്നദഃ ॥ 136 ॥ കൈകേയീരമണോ ഭദ്രാഭര്താ നാഗ്നജിതീധവഃ । മാദ്രീമനോഹരശ്ശൈബ്യാപ്രാണബംധുരുരുക്രമഃ ॥ 137 ॥ സുശീലാദയിതോ മിത്രവിംദാനേത്രമഹോത്സവഃ । ലക്ഷ്മണാവല്ലഭോ രുദ്ധപ്രാഗ്ജ്യോതിഷമഹാപുരഃ ॥ 138 ॥ സുരപാശാവൃതിച്ഛേദീ മുരാരിഃ ക്രൂരയുദ്ധവിത് । ഹയഗ്രീവശിരോഹര്താ സർവാത്മാ സർവദര്ശനഃ ॥ 139 ॥ നരകാസുരവിച്ഛേത്താ നരകാത്മജരാജ്യദഃ। പൃഥ്വീസ്തുതഃ പ്രകാശാത്മാ ഹൃദ്യോ യജ്ഞഫലപ്രദഃ ॥ 140 ॥ ഗുണഗ്രാഹീ ഗുണദ്രഷ്ടാ ഗൂഢസ്വാത്മാ വിഭൂതിമാന് । കവിര്ജഗദുപദ്രഷ്ടാ പരമാക്ഷരവിഗ്രഹഃ ॥ 141 ॥ പ്രപന്നപാലനോ മാലീ മഹദ്ബ്രഹ്മവിവര്ധനഃ । വാച്യവാചകശക്ത്യര്ഥസ്സർവവ്യാകൃതസിദ്ധിദഃ ॥ 142 ॥ സ്വയംപ്രഭുരനിർവേദ്യസ്സ്വപ്രകാശശ്ചിരംതനഃ । നാദാത്മാ മംത്രകോടീശോ നാനാവാദനിരോധകഃ ॥ 143 ॥ കംദര്പകോടിലാവണ്യഃ പരാര്ഥൈകപ്രയോജകഃ । അമരീകൃതദേവൌഘഃ കന്യകാബംധമോചനഃ ॥ 144 ॥ ഷോഡശസ്ത്രീസഹസ്രേശഃ കാംതഃ കാംതാമനോഭവഃ । ക്രീഡാരത്നാചലാഹര്താ വരുണച്ഛത്രശോഭിതഃ ॥ 145 ॥ ശക്രാഭിവംദിതശ്ശക്രജനനീകുംഡലപ്രദഃ । അദിതിപ്രസ്തുതസ്തോത്രോ ബ്രാഹ്മണോദ്ഘുഷ്ടചേഷ്ടനഃ ॥ 146 ॥ പുരാണസ്സംയമീ ജന്മാലിപ്തഃ ഷഡ്വിംശകോഽര്ഥദഃ । യശസ്യനീതിരാദ്യംതരഹിതസ്സത്കഥാപ്രിയഃ ॥ 147 ॥ ബ്രഹ്മബോധഃ പരാനംദഃ പാരിജാതാപഹാരകഃ । പൌംഡ്രകപ്രാണഹരണഃ കാശിരാജനിഷൂദനഃ ॥ 148 ॥ കൃത്യാഗർവപ്രശമനോ വിചക്രവധദീക്ഷിതഃ । കംസവിധ്വംസനസ്സാംബജനകോ ഡിംഭകാര്ദനഃ ॥ 149 ॥ മുനിര്ഗോപ്താ പിതൃവരപ്രദസ്സവനദീക്ഷിതഃ । രഥീ സാരഥ്യനിര്ദേഷ്ടാ ഫാല്ഗുനഃ ഫാല്ഗുനിപ്രിയഃ ॥ 150 ॥ സപ്താബ്ധിസ്തംഭനോദ്ഭാതോ ഹരിസ്സപ്താബ്ധിഭേദനഃ । ആത്മപ്രകാശഃ പൂര്ണശ്രീരാദിനാരായണേക്ഷിതഃ ॥ 151 ॥ വിപ്രപുത്രപ്രദശ്ചൈവ സർവമാതൃസുതപ്രദഃ । പാര്ഥവിസ്മയകൃത്പാര്ഥപ്രണവാര്ഥപ്രബോധനഃ ॥ 152 ॥ കൈലാസയാത്രാസുമുഖോ ബദര്യാശ്രമഭൂഷണഃ । ഘംടാകര്ണക്രിയാമൌഢ്യാത്തോഷിതോ ഭക്തവത്സലഃ ॥ 153 ॥ മുനിബൃംദാദിഭിര്ധ്യേയോ ഘംടാകര്ണവരപ്രദഃ । തപശ്ചര്യാപരശ്ചീരവാസാഃ പിംഗജടാധരഃ ॥ 154 ॥ പ്രത്യക്ഷീകൃതഭൂതേശശ്ശിവസ്തോതാ ശിവസ്തുതഃ । കൃഷ്ണാസ്വയംവരാലോകകൌതുകീ സർവസമ്മതഃ ॥ 155 ॥ ബലസംരംഭശമനോ ബലദര്ശിതപാംഡവഃ । യതിവേഷാര്ജുനാഭീഷ്ടദായീ സർവാത്മഗോചരഃ ॥ 156 ॥ സുഭദ്രാഫാല്ഗുനോദ്വാഹകര്താ പ്രീണിതഫാല്ഗുനഃ । ഖാംഡവപ്രീണിതാര്ചിഷ്മാന്മയദാനവമോചനഃ ॥ 157 ॥ സുലഭോ രാജസൂയാര്ഹയുധിഷ്ഠിരനിയോജകഃ । ഭീമാര്ദിതജരാസംധോ മാഗധാത്മജരാജ്യദഃ ॥ 158 ॥ രാജബംധനനിര്മോക്താ രാജസൂയാഗ്രപൂജനഃ । ചൈദ്യാദ്യസഹനോ ഭീഷ്മസ്തുതസ്സാത്വതപൂർവജഃ ॥ 159 ॥ സർവാത്മാര്ഥസമാഹര്താ മംദരാചലധാരകഃ । യജ്ഞാവതാരഃ പ്രഹ്ലാദപ്രതിജ്ഞാപ്രതിപാലകഃ ॥ 160 ॥ ബലിയജ്ഞസഭാധ്വംസീ ദൃപ്തക്ഷത്രകുലാംതകഃ । ദശഗ്രീവാംതകോ ജേതാ രേവതീപ്രേമവല്ലഭഃ ॥ 161 ॥ സർവാവതാരാധിഷ്ഠാതാ വേദബാഹ്യവിമോഹനഃ । കലിദോഷനിരാകര്താ ദശനാമാ ദൃഢവ്രതഃ ॥ 162 ॥ അമേയാത്മാ ജഗത്സ്വാമീ വാഗ്മീ ചൈദ്യശിരോഹരഃ । ദ്രൌപദീരചിതസ്തോത്രഃ കേശവഃ പുരുഷോത്തമഃ ॥ 163 ॥ നാരായണോ മധുപതിര്മാധവോ ദോഷവര്ജിതഃ । ഗോവിംദഃ പുംഡരീകാക്ഷോ വിഷ്ണുശ്ച മധുസൂദനഃ ॥ 164 ॥ ത്രിവിക്രമസ്ത്രിലോകേശോ വാമനഃ ശ്രീധരഃ പുമാന് । ഹൃഷീകേശോ വാസുദേവഃ പദ്മനാഭോ മഹാഹ്രദഃ ॥ 165 ॥ ദാമോദരശ്ചതുർവ്യൂഹഃ പാംചാലീമാനരക്ഷണഃ । സാല്വഘ്നസ്സമരശ്ലാഘീ ദംതവക്ത്രനിബര്ഹണഃ ॥ 166 ॥ ദാമോദരപ്രിയസഖാ പൃഥുകാസ്വാദനപ്രിയഃ ॥ ഘൃണീ ദാമോദരഃ ശ്രീദോ ഗോപീപുനരവേക്ഷകഃ ॥ 167 ॥ ഗോപികാമുക്തിദോ യോഗീ ദുർവാസസ്തൃപ്തികാരകഃ । അവിജ്ഞാതവ്രജാകീര്ണപാംഡവാലോകനോ ജയീ ॥ 168 ॥ പാര്ഥസാരഥ്യനിരതഃ പ്രാജ്ഞഃ പാംഡവദൂത്യകൃത് । വിദുരാതിഥ്യസംതുഷ്ടഃ കുംതീസംതോഷദായകഃ ॥ 169 ॥ സുയോധനതിരസ്കര്താ ദുര്യോധനവികാരവിത് । വിദുരാഭിഷ്ഠുതോ നിത്യോ വാര്ഷ്ണേയോ മംഗലാത്മകഃ ॥ 170 ॥ പംചവിംശതിതത്ത്വേശശ്ചതുർവിംശതിദേഹഭാക് । സർവാനുഗ്രാഹകസ്സർവദാശാര്ഹസതതാര്ചിതഃ ॥ 171 ॥ അചിംത്യോ മധുരാലാപസ്സാധുദര്ശീ ദുരാസദഃ । മനുഷ്യധര്മാനുഗതഃ കൌരവേംദ്രക്ഷയേക്ഷിതാ ॥ 172 ॥ ഉപേംദ്രോ ദാനവാരാതിരുരുഗീതോ മഹാദ്യുതിഃ । ബ്രഹ്മണ്യദേവഃ ശ്രുതിമാന് ഗോബ്രാഹ്മണഹിതാശയഃ ॥ 173 ॥ വരശീലശ്ശിവാരംഭസ്സുവിജ്ഞാനവിമൂര്തിമാന് । സ്വഭാവശുദ്ധസ്സന്മിത്രസ്സുശരണ്യസ്സുലക്ഷണഃ ॥ 174 ॥ ധൃതരാഷ്ട്രഗതൌദൃഷ്ടിപ്രദഃ കര്ണവിഭേദനഃ । പ്രതോദധൃഗ്വിശ്വരൂപവിസ്മാരിതധനംജയഃ ॥ 175 ॥ സാമഗാനപ്രിയോ ധര്മധേനുർവര്ണോത്തമോഽവ്യയഃ । ചതുര്യുഗക്രിയാകര്താ വിശ്വരൂപപ്രദര്ശകഃ ॥ 176 ॥ ബ്രഹ്മബോധപരിത്രാതപാര്ഥോ ഭീഷ്മാര്ഥചക്രഭൃത് । അര്ജുനായാസവിധ്വംസീ കാലദംഷ്ട്രാവിഭൂഷണഃ ॥ 177 ॥ സുജാതാനംതമഹിമാ സ്വപ്നവ്യാപാരിതാര്ജുനഃ । അകാലസംധ്യാഘടനശ്ചക്രാംതരിതഭാസ്കരഃ ॥ 178 ॥ ദുഷ്ടപ്രമഥനഃ പാര്ഥപ്രതിജ്ഞാപരിപാലകഃ । സിംധുരാജശിരഃപാതസ്ഥാനവക്താ വിവേകദൃക് ॥ 179 ॥ സുഭദ്രാശോകഹരണോ ദ്രോണോത്സേകാദിവിസ്മിതഃ । പാര്ഥമന്യുനിരാകര്താ പാംഡവോത്സവദായകഃ ॥ 180 ॥ അംഗുഷ്ഠാക്രാംതകൌംതേയരഥശ്ശക്തോഽഹിശീര്ഷജിത് । കാലകോപപ്രശമനോ ഭീമസേനജയപ്രദഃ ॥ 181 ॥ അശ്വത്ഥാമവധായാസത്രാതപാംഡുസുതഃ കൃതീ । ഇഷീകാസ്ത്രപ്രശമനോ ദ്രൌണിരക്ഷാവിചക്ഷണഃ ॥ 182 ॥ പാര്ഥാപഹാരിതദ്രൌണിചൂഡാമണിരഭംഗുരഃ । ധൃതരാഷ്ട്രപരാമൃഷ്ടഭീമപ്രതികൃതിസ്മയഃ ॥ 183 ॥ ഭീഷ്മബുദ്ധിപ്രദശ്ശാംതശ്ശരച്ചംദ്രനിഭാനനഃ । ഗദാഗ്രജന്മാ പാംചാലീപ്രതിജ്ഞാപരിപാലകഃ ॥ 184 ॥ ഗാംധാരീകോപദൃഗ്ഗുപ്തധര്മസൂനുരനാമയഃ । പ്രപന്നാര്തിഭയച്ഛേത്താ ഭീഷ്മശല്യവ്യധാവഹഃ ॥ 185 ॥ ശാംതശ്ശാംതനവോദീര്ണസർവധര്മസമാഹിതഃ । സ്മാരിതബ്രഹ്മവിദ്യാര്ഥപ്രീതപാര്ഥോ മഹാസ്ത്രവിത് ॥ 186 ॥ പ്രസാദപരമോദാരോ ഗാംഗേയസുഗതിപ്രദഃ । വിപക്ഷപക്ഷക്ഷയകൃത്പരീക്ഷിത്പ്രാണരക്ഷണഃ ॥ 187 ॥ ജഗദ്ഗുരുര്ധര്മസൂനോർവാജിമേധപ്രവര്തകഃ । വിഹിതാര്ഥാപ്തസത്കാരോ മാസകാത്പരിവര്തദഃ ॥ 188 ॥ ഉത്തംകഹര്ഷദാത്മീയദിവ്യരൂപപ്രദര്ശകഃ । ജനകാവഗതസ്വോക്തഭാരതസ്സർവഭാവനഃ ॥ 189 ॥ അസോഢയാദവോദ്രേകോ വിഹിതാപ്താദിപൂജനഃ ॥ സമുദ്രസ്ഥാപിതാശ്ചര്യമുസലോ വൃഷ്ണിവാഹകഃ ॥ 190 ॥ മുനിശാപായുധഃ പദ്മാസനാദിത്രിദശാര്ഥിതഃ । വൃഷ്ടിപ്രത്യവഹാരോത്കസ്സ്വധാമഗമനോത്സുകഃ ॥ 191 ॥ പ്രഭാസാലോകനോദ്യുക്തോ നാനാവിധനിമിത്തകൃത് । സർവയാദവസംസേവ്യസ്സർവോത്കൃഷ്ടപരിച്ഛദഃ ॥ 192 ॥ വേലാകാനനസംചാരീ വേലാനിലഹൃതശ്രമഃ । കാലാത്മാ യാദവോഽനംതസ്സ്തുതിസംതുഷ്ടമാനസഃ ॥ 193 ॥ ദ്വിജാലോകനസംതുഷ്ടഃ പുണ്യതീര്ഥമഹോത്സവഃ । സത്കാരാഹ്ലാദിതാശേഷഭൂസുരസ്സുരവല്ലഭഃ ॥ 194 ॥ പുണ്യതീര്ഥാപ്ലുതഃ പുണ്യഃ പുണ്യദസ്തീര്ഥപാവനഃ । വിപ്രസാത്കൃതഗോകോടിശ്ശതകോടിസുവര്ണദഃ ॥ 195 ॥ സ്വമായാമോഹിതാഽശേഷവൃഷ്ണിവീരോ വിശേഷവിത് । ജലജായുധനിര്ദേഷ്ടാ സ്വാത്മാവേശിതയാദവഃ ॥ 196 ॥ ദേവതാഭീഷ്ടവരദഃ കൃതകൃത്യഃ പ്രസന്നധീഃ । സ്ഥിരശേഷായുതബലസ്സഹസ്രഫണിവീക്ഷണഃ ॥ 197 ॥ ബ്രഹ്മവൃക്ഷവരച്ഛായാസീനഃ പദ്മാസനസ്ഥിതഃ । പ്രത്യഗാത്മാ സ്വഭാവാര്ഥഃ പ്രണിധാനപരായണഃ ॥ 198 ॥ വ്യാധേഷുവിദ്ധപൂജ്യാംഘ്രിര്നിഷാദഭയമോചനഃ । പുലിംദസ്തുതിസംതുഷ്ടഃ പുലിംദസുഗതിപ്രദഃ ॥ 199 ॥ ദാരുകാര്പിതപാര്ഥാദികരണീയോക്തിരീശിതാ । ദിവ്യദുംദുഭിസംയുക്തഃ പുഷ്പവൃഷ്ടിപ്രപൂജിതഃ ॥ 200 ॥ പുരാണഃ പരമേശാനഃ പൂര്ണഭൂമാ പരിഷ്ടുതഃ । പതിരാദ്യഃ പരം ബ്രഹ്മ പരമാത്മാ പരാത്പരഃ ॥ 201 ॥ ശ്രീപരമാത്മാ പരാത്പരഃ ഓം നമഃ ഇതി । ഫലശ്രുതിഃ – ഇദം സഹസ്രം കൃഷ്ണസ്യ നാമ്നാം സർവാര്ഥദായകമ് । അനംതരൂപീ ഭഗവാന് വ്യാഖ്യാതാദൌ സ്വയംഭുവേ ॥ 202 ॥ തേന പ്രോക്തം വസിഷ്ഠായ തതോ ലബ്ധ്വാ പരാശരഃ । വ്യാസായ തേന സംപ്രോക്തം ശുകോ വ്യാസാദവാപ്തവാന് ॥ 203 ॥ തച്ഛിഷ്യൈര്ബഹുഭിര്ഭൂമൌ ഖ്യാപിതം ദ്വാപരേ യുഗേ । കൃഷ്ണാജ്ഞയാ ഹരിഹരഃ കലൌ പ്രഖ്യാപയദ്വിഭുഃ ॥ 204 ॥ ഇദം പഠതി ഭക്ത്യാ യഃ ശൃണോതി ച സമാഹിതഃ । സ്വസിദ്ധ്യൈ പ്രാര്ഥയംത്യേനം തീര്ഥക്ഷേത്രാദിദേവതാഃ ॥ 205 ॥ പ്രായശ്ചിത്താന്യശേഷാണി നാലം യാനി വ്യപോഹിതുമ് । താനി പാപാനി നശ്യംതി സകൃദസ്യ പ്രശംസനാത് ॥ 206 ॥ ഋണത്രയവിമുക്തസ്യ ശ്രൌതസ്മാര്താനുവര്തിനഃ । ഋഷേസ്ത്രിമൂര്തിരൂപസ്യ ഫലം വിംദേദിദം പഠന് ॥ 207 ॥ ഇദം നാമസഹസ്രം യഃ പഠത്യേതച്ഛൃണോതി ച । ശിവലിംഗസഹസ്രസ്യ സ പ്രതിഷ്ഠാഫലം ലഭേത് ॥ 208 ॥ ഇദം കിരീടീ സംജപ്യ ജയീ പാശുപതാസ്ത്രഭാക് । കൃഷ്ണസ്യ പ്രാണഭൂതസ്സന് കൃഷ്ണം സാരഥിമാപ്തവാന് ॥ 209 ॥ ദ്രൌപദ്യാ ദമയംത്യാ ച സാവിത്ര്യാ ച സുശീലയാ । ദുരിതാനി ജിതാന്യേതജ്ജപാദാപ്തം ച വാംഛിതമ് ॥ 210 ॥ കിമിദം ബഹുനാ ശംസന്മാനവോ മോദനിര്ഭരഃ । ബ്രഹ്മാനംദമവാപ്യാംതേ കൃഷ്ണസായൂജ്യമാപ്നുയാത് ॥ 211 ॥