namāmi kṛṣṇarūpiṇīṃ kṛṣṇāṅgayaṣṭidhāriṇīm । samagratattvasāgaraṃ apārapāragahvarām ॥ 1 ॥ śivāprabhāṃ samujjvalāṃ sphuracchaśāṅkaśekharām । lalāṭaratnabhāskarāṃ jagatpradīptibhāskarām ॥ 2 ॥ mahendrakaśyapārcitāṃ sanatkumārasaṃstutām । surāsurendravanditāṃ yathārthanirmalādbhutām ॥ 3 ॥ atarkyarocirūrjitāṃ vikāradoṣavarjitām । mumukṣubhirvicintitāṃ viśeṣatattvasūcitām ॥ 4 ॥ mṛtāsthinirmitasrajāṃ mṛgendravāhanāgrajām । suśuddhatattvatoṣaṇāṃ trivedapārabhūṣaṇām ॥ 5 ॥ bhujaṅgahārahāriṇīṃ kapālakhaṇḍadhāriṇīm । sudhārmikaupakāriṇīṃ surendravairighātinīm ॥ 6 ॥ kuṭhārapāśacāpinīṃ kṛtāntakāmabhedinīm । śubhāṃ kapālamālinīṃ suvarṇakalpaśākhinīm ॥ 7 ॥ śmaśānabhūmivāsinīṃ dvijendramaulibhāvinīm । tamo'ndhakārayāminīṃ śivasvabhāvakāminīm ॥ 8 ॥ sahasrasūryarājikāṃ dhanañjayograkārikām । suśuddhakālakandalāṃ subhṛṅgabṛndamañjulām ॥ 9 ॥ prajāyinīṃ prajāvatīṃ namāmi mātaraṃ satīm । svakarmakāraṇe gatiṃ harapriyāṃ ca pārvatīm ॥ 10 ॥ anantaśaktikāntidāṃ yaśo'rthabhuktimuktidām । punaḥ punarjagaddhitāṃ namāmyahaṃ surārcitām ॥ 11 ॥ jayeśvari trilocane prasīda devi pāhi mām । jayanti te stuvanti ye śubhaṃ labhantyamokṣataḥ ॥ 12 ॥ sadaiva te hatadviṣaḥ paraṃ bhavanti sajjuṣaḥ । jarāḥ pare śive'dhunā prasādhi māṃ karomi kim ॥ 13 ॥ atīva mohitātmano vṛthā viceṣṭitasya me । kuru prasāditaṃ mano yathāsmi janmabhañjanaḥ ॥ 14 ॥ tathā bhavantu tāvakā yathaiva ghoṣitālakāḥ । imāṃ stutiṃ mameritāṃ paṭhanti kālisādhakāḥ । na te punaḥ sudustare patanti mohagahvare ॥ 15 ॥ iti kālīrahasye brahma kṛta śrī kālī stutiḥ ॥