brahmaviṣṇu ūcatuḥ । namāmi tvāṃ viśvakartrīṃ pareśīṃ nityāmādyāṃ satyavijñānarūpām । vācātītāṃ nirguṇāṃ cātisūkṣmāṃ jñānātītāṃ śuddhavijñānagamyām ॥ 1 ॥ pūrṇāṃ śuddhāṃ viśvarūpāṃ surūpāṃ devīṃ vandyāṃ viśvavandyāmapi tvām । sarvāntaḥsthāmuttamasthānasaṃsthā- -mīḍe kālīṃ viśvasampālayitrīm ॥ 2 ॥ māyātītāṃ māyinīṃ vāpi māyāṃ bhīmāṃ śyāmāṃ bhīmanetrāṃ sureśīm । vidyāṃ siddhāṃ sarvabhūtāśayasthā- -mīḍe kālīṃ viśvasaṃhārakartrīm ॥ 3 ॥ no te rūpaṃ vetti śīlaṃ na dhāma no vā dhyānam nāpi mantraṃ maheśi । sattārūpe tvāṃ prapadye śaraṇye viśvārādhye sarvalokaikahetum ॥ 4 ॥ dyauste śīrṣaṃ nābhideśo nabhaśca cakṣūṃṣi te candrasūryānalāste । unmeṣāste suprabodho divā ca rātrirmātaścakṣuṣoste nimeṣam ॥ 5 ॥ vākyaṃ devā bhūmireṣā nitambaṃ pādau gulphaṃ jānujaṅghastvadhaste । prītirdharmo'dharmakāryaṃ hi kopaḥ sṛṣṭirbodhaḥ saṃhṛtiste tu nidrā ॥ 6 ॥ agnirjihvā brāhmaṇāste mukhābjaṃ sandhye dve te bhrūyugaṃ viśvamūrtiḥ । śvāso vāyurbāhavo lokapālāḥ krīḍā sṛṣṭiḥ saṃsthitiḥ saṃhṛtiste ॥ 7 ॥ evambhūtāṃ devi viśvātmikāṃ tvāṃ kālīṃ vande brahmavidyāsvarūpām । mātaḥ pūrṇe brahmavijñānagamye durge'pāre sārarūpe prasīda ॥ 8 ॥ iti śrī mahābhāgavate mahāpurāṇe brahmaviṣṇukṛtā śrī bhadrakālī stutiḥ ।