வக்ரதுண்ட³ க³ணேஶ கவசம்

மௌலிம்ʼ மஹேஶபுத்ரோ(அ)வ்யாத்³பா⁴லம்ʼ பாது விநாயக꞉ ।

த்ரிநேத்ர꞉ பாது மே நேத்ரே ஶூர்பகர்ணோ(அ)வது ஶ்ருதீ ॥ 1 ॥

ஹேரம்போ³ ரக்ஷது க்⁴ராணம்ʼ முக²ம்ʼ பாது க³ஜானன꞉ ।

ஜிஹ்வாம்ʼ பாது க³ணேஶோ மே கண்ட²ம்ʼ ஶ்ரீகண்ட²வல்லப⁴꞉ ॥ 2 ॥

ஸ்கந்தௌ⁴ மஹாப³ல꞉ பாது விக்⁴னஹா பாது மே பு⁴ஜௌ ।

கரௌ பரஶுப்⁴ருʼத்பாது ஹ்ருʼத³யம்ʼ ஸ்கந்த³பூர்வஜ꞉ ॥ 3 ॥

மத்⁴யம்ʼ லம்போ³த³ர꞉ பாது நாபி⁴ம்ʼ ஸிந்தூ³ரபூ⁴ஷித꞉ ।

ஜக⁴னம்ʼ பார்வதீபுத்ர꞉ ஸக்தி²னீ பாது பாஶப்⁴ருʼத் ॥ 4 ॥

ஜானுனீ ஜக³தாம்ʼ நாதோ² ஜங்கே⁴ மூஷகவாஹன꞉ ।

பாதௌ³ பத்³மாஸன꞉ பாது பாதா³தோ⁴ தை³த்யத³ர்பஹா ॥ 5 ॥

ஏகத³ந்தோ(அ)க்³ரத꞉ பாது ப்ருʼஷ்டே² பாது க³ணாதி⁴ப꞉ ।

பார்ஶ்வயோர்மோத³காஹாரோ தி³க்³விதி³க்ஷு ச ஸித்³தி⁴த³꞉ ॥ 6 ॥

வ்ரஜதஸ்திஷ்ட²தோ வாபி ஜாக்³ரத꞉ ஸ்வபதோ(அ)ஶ்னத꞉ ।

சதுர்தீ²வல்லபோ⁴ தே³வ꞉ பாது மே பு⁴க்திமுக்தித³꞉ ॥ 7 ॥

இத³ம்ʼ பவித்ரம்ʼ ஸ்தோத்ரம்ʼ ச சதுர்த்²யாம்ʼ நியத꞉ படே²த் ।

ஸிந்தூ³ரரக்த꞉ குஸுமைர்தூ³ர்வயா பூஜ்ய விக்⁴னபம் ॥ 8 ॥

ராஜா ராஜஸுதோ ராஜபத்னீ மந்த்ரீ குலம்ʼ சலம் ।

தஸ்யாவஶ்யம்ʼ ப⁴வேத்³வஶ்யம்ʼ விக்⁴னராஜப்ரஸாத³த꞉ ॥ 9 ॥

ஸமந்த்ரயந்த்ரம்ʼ ய꞉ ஸ்தோத்ரம்ʼ கரே ஸம்ʼலிக்²ய தா⁴ரயேத் ।

த⁴னதா⁴ன்யஸம்ருʼத்³தி⁴꞉ ஸ்யாத்தஸ்ய நாஸ்த்யத்ர ஸம்ʼஶய꞉ ॥ 10 ॥

அஸ்ய மந்த்ர꞉ –

ஐம்ʼ க்லீம்ʼ ஹ்ரீம்ʼ வக்ரதுண்டா³ய ஹும் ।

ரஸலக்ஷம்ʼ ஸதை³காக்³ர்ய꞉ ஷட³ங்க³ந்யாஸபூர்வகம் ।

ஹுத்வா தத³ந்தே விதி⁴வத³ஷ்டத்³ரவ்யம்ʼ பயோ க்⁴ருʼதம் ॥ 11 ॥

யம்ʼ யம்ʼ காமமபி⁴த்⁴யாயன் குருதே கர்ம கிஞ்சன ।

தம்ʼ தம்ʼ ஸர்வமவாப்னோதி வக்ரதுண்ட³ப்ரஸாத³த꞉ ॥ 12 ॥

ப்⁴ருʼகு³ப்ரணீதம்ʼ ய꞉ ஸ்தோத்ரம்ʼ பட²தே பு⁴வி மானவ꞉ ।

ப⁴வேத³வ்யாஹதைஶ்வர்ய꞉ ஸ க³ணேஶப்ரஸாத³த꞉ ॥ 13 ॥

இதி க³ணேஶரக்ஷாகரம்ʼ ஸ்தோத்ரம்ʼ ஸம்பூர்ணம் ।

Recite with devotion and pure heart

Regular practice brings spiritual benefits