vyāsa uvāca – kathaṃ nāmnāṃ sahasraṃ taṃ gaṇeśa upadiṣṭavān । śivadaṃ tanmamācakṣva lokānugrahatatpara ॥ 1 ॥ brahmovāca – devaḥ pūrvaṃ purārātiḥ puratrayajayodyame । anarcanādgaṇeśasya jāto vighnākulaḥ kila ॥ 2 ॥ manasā sa vinirdhārya dadṛśe vighnakāraṇam । mahāgaṇapatiṃ bhaktyā samabhyarcya yathāvidhi ॥ 3 ॥ vighnapraśamanopāyamapṛcchadapariśramam । saṃtuṣṭaḥ pūjayā śaṃbhormahāgaṇapatiḥ svayam ॥ 4 ॥ sarvavighnapraśamanaṃ sarvakāmaphalapradam । tatastasmai svayaṃ nāmnāṃ sahasramidamabravīt ॥ 5 ॥ asya śrīmahāgaṇapatisahasranāmastotramālāmaṃtrasya । gaṇeśa ṛṣiḥ, mahāgaṇapatirdevatā, nānāvidhānicchaṃdāṃsi । humiti bījam, tuṃgamiti śaktiḥ, svāhāśaktiriti kīlakam । sakalavighnavināśanadvārā śrīmahāgaṇapatiprasādasiddhyarthe jape viniyogaḥ । atha karanyāsaḥ – gaṇeśvaro gaṇakrīḍa ityaṃguṣṭhābhyāṃ namaḥ । kumāragururīśāna iti tarjanībhyāṃ namaḥ ॥ brahmāṃḍakuṃbhaścidvyometi madhyamābhyāṃ namaḥ । rakto raktāṃbaradhara ityanāmikābhyāṃ namaḥ sarvasadgurusaṃsevya iti kaniṣṭhikābhyāṃ namaḥ । luptavighnaḥ svabhaktānāmiti karatalakarapṛṣṭhābhyāṃ namaḥ ॥ atha aṃganyāsaḥ – chaṃdaśchaṃdodbhava iti hṛdayāya namaḥ । niṣkalo nirmala iti śirase svāhā । sṛṣṭisthitilayakrīḍa iti śikhāyai vaṣaṭ । jñānaṃ vijñānamānaṃda iti kavacāya hum । aṣṭāṃgayogaphalabhṛditi netratrayāya vauṣaṭ । anaṃtaśaktisahita ityastrāya phaṭ । bhūrbhuvaḥ svaroṃ iti digbaṃdhaḥ । atha dhyānam – gajavadanamaciṃtyaṃ tīkṣṇadaṃṣṭraṃ trinetraṃ bṛhadudaramaśeṣaṃ bhūtirājaṃ purāṇam । amaravarasupūjyaṃ raktavarṇaṃ sureśaṃ paśupatisutamīśaṃ vighnarājaṃ namāmi ॥ śrīgaṇapatiruvāca – oṃ gaṇeśvaro gaṇakrīḍo gaṇanātho gaṇādhipaḥ । ekadaṃto vakratuṃḍo gajavaktro mahodaraḥ ॥ 1 ॥ laṃbodaro dhūmravarṇo vikaṭo vighnanāśanaḥ । sumukho durmukho buddho vighnarājo gajānanaḥ ॥ 2 ॥ bhīmaḥ pramoda āmodaḥ surānaṃdo madotkaṭaḥ । heraṃbaḥ śaṃbaraḥ śaṃbhurlaṃbakarṇo mahābalaḥ ॥ 3 ॥ naṃdano laṃpaṭo bhīmo meghanādo gaṇaṃjayaḥ । vināyako virūpākṣo vīraḥ śūravarapradaḥ ॥ 4 ॥ mahāgaṇapatirbuddhipriyaḥ kṣipraprasādanaḥ । rudrapriyo gaṇādhyakṣa umāputro'ghanāśanaḥ ॥ 5 ॥ kumāragururīśānaputro mūṣakavāhanaḥ । siddhipriyaḥ siddhipatiḥ siddhaḥ siddhivināyakaḥ ॥ 6 ॥ avighnastuṃburuḥ siṃhavāhano mohinīpriyaḥ । kaṭaṃkaṭo rājaputraḥ śākalaḥ saṃmitomitaḥ ॥ 7 ॥ kūṣmāṃḍasāmasaṃbhūtirdurjayo dhūrjayo jayaḥ । bhūpatirbhuvanapatirbhūtānāṃ patiravyayaḥ ॥ 8 ॥ viśvakartā viśvamukho viśvarūpo nidhirguṇaḥ । kaviḥ kavīnāmṛṣabho brahmaṇyo brahmavitpriyaḥ ॥ 9 ॥ jyeṣṭharājo nidhipatirnidhipriyapatipriyaḥ । hiraṇmayapurāṃtaḥsthaḥ sūryamaṃḍalamadhyagaḥ ॥ 10 ॥ karāhatidhvastasiṃdhusalilaḥ pūṣadaṃtabhit । umāṃkakelikutukī muktidaḥ kulapāvanaḥ ॥ 11 ॥ kirīṭī kuṃḍalī hārī vanamālī manomayaḥ । vaimukhyahatadaityaśrīḥ pādāhatijitakṣitiḥ ॥ 12 ॥ sadyojātaḥ svarṇamuṃjamekhalī durnimittahṛt । duḥsvapnahṛtprasahano guṇī nādapratiṣṭhitaḥ ॥ 13 ॥ surūpaḥ sarvanetrādhivāso vīrāsanāśrayaḥ । pītāṃbaraḥ khaṃḍaradaḥ khaṃḍavaiśākhasaṃsthitaḥ ॥ 14 ॥ citrāṃgaḥ śyāmadaśano bhālacaṃdro havirbhujaḥ । yogādhipastārakasthaḥ puruṣo gajakarṇakaḥ ॥ 15 ॥ gaṇādhirājo vijayaḥ sthiro gajapatidhvajī । devadevaḥ smaraḥ prāṇadīpako vāyukīlakaḥ ॥ 16 ॥ vipaścidvarado nādo nādabhinnamahācalaḥ । varāharadano mṛtyuṃjayo vyāghrājināṃbaraḥ ॥ 17 ॥ icchāśaktibhavo devatrātā daityavimardanaḥ । śaṃbhuvaktrodbhavaḥ śaṃbhukopahā śaṃbhuhāsyabhūḥ ॥ 18 ॥ śaṃbhutejāḥ śivāśokahārī gaurīsukhāvahaḥ । umāṃgamalajo gaurītejobhūḥ svardhunībhavaḥ ॥ 19 ॥ yajñakāyo mahānādo girivarṣmā śubhānanaḥ । sarvātmā sarvadevātmā brahmamūrdhā kakupśrutiḥ ॥ 20 ॥ brahmāṃḍakuṃbhaścidvyomabhālaḥsatyaśiroruhaḥ । jagajjanmalayonmeṣanimeṣo'gnyarkasomadṛk ॥ 21 ॥ girīṃdraikarado dharmādharmoṣṭhaḥ sāmabṛṃhitaḥ । graharkṣadaśano vāṇījihvo vāsavanāsikaḥ ॥ 22 ॥ bhrūmadhyasaṃsthitakaro brahmavidyāmadodakaḥ । kulācalāṃsaḥ somārkaghaṃṭo rudraśirodharaḥ ॥ 23 ॥ nadīnadabhujaḥ sarpāṃgulīkastārakānakhaḥ । vyomanābhiḥ śrīhṛdayo merupṛṣṭho'rṇavodaraḥ ॥ 24 ॥ kukṣisthayakṣagaṃdharvarakṣaḥkinnaramānuṣaḥ । pṛthvīkaṭiḥ sṛṣṭiliṃgaḥ śailorurdasrajānukaḥ ॥ 25 ॥ pātālajaṃgho munipātkālāṃguṣṭhastrayītanuḥ । jyotirmaṃḍalalāṃgūlo hṛdayālānaniścalaḥ ॥ 26 ॥ hṛtpadmakarṇikāśālī viyatkelisarovaraḥ । sadbhaktadhyānanigaḍaḥ pūjāvārinivāritaḥ ॥ 27 ॥ pratāpī kāśyapo maṃtā gaṇako viṣṭapī balī । yaśasvī dhārmiko jetā prathamaḥ pramatheśvaraḥ ॥ 28 ॥ ciṃtāmaṇirdvīpapatiḥ kalpadrumavanālayaḥ । ratnamaṃḍapamadhyastho ratnasiṃhāsanāśrayaḥ ॥ 29 ॥ tīvrāśiroddhṛtapado jvālinīmaulilālitaḥ । naṃdānaṃditapīṭhaśrīrbhogado bhūṣitāsanaḥ ॥ 30 ॥ sakāmadāyinīpīṭhaḥ sphuradugrāsanāśrayaḥ । tejovatīśiroratnaṃ satyānityāvataṃsitaḥ ॥ 31 ॥ savighnanāśinīpīṭhaḥ sarvaśaktyaṃbujālayaḥ । lipipadmāsanādhāro vahnidhāmatrayālayaḥ ॥ 32 ॥ unnataprapado gūḍhagulphaḥ saṃvṛtapārṣṇikaḥ । pīnajaṃghaḥ śliṣṭajānuḥ sthūloruḥ pronnamatkaṭiḥ ॥ 33 ॥ nimnanābhiḥ sthūlakukṣiḥ pīnavakṣā bṛhadbhujaḥ । pīnaskaṃdhaḥ kaṃbukaṃṭho laṃboṣṭho laṃbanāsikaḥ ॥ 34 ॥ bhagnavāmaradastuṃgasavyadaṃto mahāhanuḥ । hrasvanetratrayaḥ śūrpakarṇo nibiḍamastakaḥ ॥ 35 ॥ stabakākārakuṃbhāgro ratnamaulirniraṃkuśaḥ । sarpahārakaṭīsūtraḥ sarpayajñopavītavān ॥ 36 ॥ sarpakoṭīrakaṭakaḥ sarpagraiveyakāṃgadaḥ । sarpakakṣodarābaṃdhaḥ sarparājottaracchadaḥ ॥ 37 ॥ rakto raktāṃbaradharo raktamālāvibhūṣaṇaḥ । raktekṣano raktakaro raktatālvoṣṭhapallavaḥ ॥ 38 ॥ śvetaḥ śvetāṃbaradharaḥ śvetamālāvibhūṣaṇaḥ । śvetātapatraruciraḥ śvetacāmaravījitaḥ ॥ 39 ॥ sarvāvayavasaṃpūrṇaḥ sarvalakṣaṇalakṣitaḥ । sarvābharaṇaśobhāḍhyaḥ sarvaśobhāsamanvitaḥ ॥ 40 ॥ sarvamaṃgalamāṃgalyaḥ sarvakāraṇakāraṇam । sarvadevavaraḥ śāraṃgī bījapūrī gadādharaḥ ॥ 41 ॥ śubhāṃgo lokasāraṃgaḥ sutaṃtustaṃtuvardhanaḥ । kirīṭī kuṃḍalī hārī vanamālī śubhāṃgadaḥ ॥ 42 ॥ ikṣucāpadharaḥ śūlī cakrapāṇiḥ sarojabhṛt । pāśī dhṛtotpalaḥ śālimaṃjarībhṛtsvadaṃtabhṛt ॥ 43 ॥ kalpavallīdharo viśvābhayadaikakaro vaśī । akṣamālādharo jñānamudrāvān mudgarāyudhaḥ ॥ 44 ॥ pūrṇapātrī kaṃbudharo vidhṛtāṃkuśamūlakaḥ । karasthāmraphalaścūtakalikābhṛtkuṭhāravān ॥ 45 ॥ puṣkarasthasvarṇaghaṭīpūrṇaratnābhivarṣakaḥ । bhāratīsuṃdarīnātho vināyakaratipriyaḥ ॥ 46 ॥ mahālakṣmīpriyatamaḥ siddhalakṣmīmanoramaḥ । ramārameśapūrvāṃgo dakṣiṇomāmaheśvaraḥ ॥ 47 ॥ mahīvarāhavāmāṃgo ratikaṃdarpapaścimaḥ । āmodamodajananaḥ sapramodapramodanaḥ ॥ 48 ॥ saṃvardhitamahāvṛddhirṛddhisiddhipravardhanaḥ । daṃtasaumukhyasumukhaḥ kāṃtikaṃdalitāśrayaḥ ॥ 49 ॥ madanāvatyāśritāṃghriḥ kṛtavaimukhyadurmukhaḥ । vighnasaṃpallavaḥ padmaḥ sarvonnatamadadravaḥ ॥ 50 ॥ vighnakṛnnimnacaraṇo drāviṇīśaktisatkṛtaḥ । tīvrāprasannanayano jvālinīpālitaikadṛk ॥ 51 ॥ mohinīmohano bhogadāyinīkāṃtimaṃḍanaḥ । kāminīkāṃtavaktraśrīradhiṣṭhitavasuṃdharaḥ ॥ 52 ॥ vasudhārāmadonnādo mahāśaṃkhanidhipriyaḥ । namadvasumatīmālī mahāpadmanidhiḥ prabhuḥ ॥ 53 ॥ sarvasadgurusaṃsevyaḥ śociṣkeśahṛdāśrayaḥ । īśānamūrdhā deveṃdraśikhaḥ pavananaṃdanaḥ ॥ 54 ॥ pratyugranayano divyo divyāstraśataparvadhṛk । airāvatādisarvāśāvāraṇo vāraṇapriyaḥ ॥ 55 ॥ vajrādyastraparīvāro gaṇacaṃḍasamāśrayaḥ । jayājayaparikaro vijayāvijayāvahaḥ ॥ 56 ॥ ajayārcitapādābjo nityānaṃdavanasthitaḥ । vilāsinīkṛtollāsaḥ śauṃḍī sauṃdaryamaṃḍitaḥ ॥ 57 ॥ anaṃtānaṃtasukhadaḥ sumaṃgalasumaṃgalaḥ । jñānāśrayaḥ kriyādhāra icchāśaktiniṣevitaḥ ॥ 58 ॥ subhagāsaṃśritapado lalitālalitāśrayaḥ । kāminīpālanaḥ kāmakāminīkelilālitaḥ ॥ 59 ॥ sarasvatyāśrayo gaurīnaṃdanaḥ śrīniketanaḥ । guruguptapado vācāsiddho vāgīśvarīpatiḥ ॥ 60 ॥ nalinīkāmuko vāmārāmo jyeṣṭhāmanoramaḥ । raudrīmudritapādābjo huṃbījastuṃgaśaktikaḥ ॥ 61 ॥ viśvādijananatrāṇaḥ svāhāśaktiḥ sakīlakaḥ । amṛtābdhikṛtāvāso madaghūrṇitalocanaḥ ॥ 62 ॥ ucchiṣṭocchiṣṭagaṇako gaṇeśo gaṇanāyakaḥ । sārvakālikasaṃsiddhirnityasevyo digaṃbaraḥ ॥ 63 ॥ anapāyo'naṃtadṛṣṭiraprameyo'jarāmaraḥ । anāvilo'pratihatiracyuto'mṛtamakṣaraḥ ॥ 64 ॥ apratarkyo'kṣayo'jayyo'nādhāro'nāmayomalaḥ । ameyasiddhiradvaitamaghoro'gnisamānanaḥ ॥ 65 ॥ anākāro'bdhibhūmyagnibalaghno'vyaktalakṣaṇaḥ । ādhārapīṭhamādhāra ādhārādheyavarjitaḥ ॥ 66 ॥ ākhuketana āśāpūraka ākhumahārathaḥ । ikṣusāgaramadhyastha ikṣubhakṣaṇalālasaḥ ॥ 67 ॥ ikṣucāpātirekaśrīrikṣucāpaniṣevitaḥ । iṃdragopasamānaśrīriṃdranīlasamadyutiḥ ॥ 68 ॥ iṃdīvaradalaśyāma iṃdumaṃḍalamaṃḍitaḥ । idhmapriya iḍābhāga iḍāvāniṃdirāpriyaḥ ॥ 69 ॥ ikṣvākuvighnavidhvaṃsī itikartavyatepsitaḥ । īśānamaulirīśāna īśānapriya ītihā ॥ 70 ॥ īṣaṇātrayakalpāṃta īhāmātravivarjitaḥ । upeṃdra uḍubhṛnmauliruḍunāthakarapriyaḥ ॥ 71 ॥ unnatānana uttuṃga udārastridaśāgraṇīḥ । ūrjasvānūṣmalamada ūhāpohadurāsadaḥ ॥ 72 ॥ ṛgyajuḥsāmanayana ṛddhisiddhisamarpakaḥ । ṛjucittaikasulabho ṛṇatrayavimocanaḥ ॥ 73 ॥ luptavighnaḥ svabhaktānāṃ luptaśaktiḥ suradviṣām । luptaśrīrvimukhārcānāṃ lūtāvisphoṭanāśanaḥ ॥ 74 ॥ ekārapīṭhamadhyastha ekapādakṛtāsanaḥ । ejitākhiladaityaśrīredhitākhilasaṃśrayaḥ ॥ 75 ॥ aiśvaryanidhiraiśvaryamaihikāmuṣmikapradaḥ । airaṃmadasamonmeṣa airāvatasamānanaḥ ॥ 76 ॥ oṃkāravācya oṃkāra ojasvānoṣadhīpatiḥ । audāryanidhirauddhatyadhairya aunnatyaniḥsamaḥ ॥ 77 ॥ aṃkuśaḥ suranāgānāmaṃkuśākārasaṃsthitaḥ । aḥ samastavisargāṃtapadeṣu parikīrtitaḥ ॥ 78 ॥ kamaṃḍaludharaḥ kalpaḥ kapardī kalabhānanaḥ । karmasākṣī karmakartā karmākarmaphalapradaḥ ॥ 79 ॥ kadaṃbagolakākāraḥ kūṣmāṃḍagaṇanāyakaḥ । kāruṇyadehaḥ kapilaḥ kathakaḥ kaṭisūtrabhṛt ॥ 80 ॥ kharvaḥ khaḍgapriyaḥ khaḍgaḥ khāṃtāṃtaḥsthaḥ khanirmalaḥ । khalvāṭaśṛṃganilayaḥ khaṭvāṃgī khadurāsadaḥ ॥ 81 ॥ guṇāḍhyo gahano gadyo gadyapadyasudhārṇavaḥ । gadyagānapriyo garjo gītagīrvāṇapūrvajaḥ ॥ 82 ॥ guhyācārarato guhyo guhyāgamanirūpitaḥ । guhāśayo guḍābdhistho gurugamyo gururguruḥ ॥ 83 ॥ ghaṃṭāghargharikāmālī ghaṭakuṃbho ghaṭodaraḥ । ṅakāravācyo ṅākāro ṅakārākāraśuṃḍabhṛt ॥ 84 ॥ caṃḍaścaṃḍeśvaraścaṃḍī caṃḍeśaścaṃḍavikramaḥ । carācarapitā ciṃtāmaṇiścarvaṇalālasaḥ ॥ 85 ॥ chaṃdaśchaṃdodbhavaśchaṃdo durlakṣyaśchaṃdavigrahaḥ । jagadyonirjagatsākṣī jagadīśo jaganmayaḥ ॥ 86 ॥ japyo japaparo jāpyo jihvāsiṃhāsanaprabhuḥ । sravadgaṃḍollasaddhānajhaṃkāribhramarākulaḥ ॥ 87 ॥ ṭaṃkārasphārasaṃrāvaṣṭaṃkāramaṇinūpuraḥ । ṭhadvayīpallavāṃtasthasarvamaṃtreṣu siddhidaḥ ॥ 88 ॥ ḍiṃḍimuṃḍo ḍākinīśo ḍāmaro ḍiṃḍimapriyaḥ । ḍhakkāninādamudito ḍhauṃko ḍhuṃḍhivināyakaḥ ॥ 89 ॥ tattvānāṃ prakṛtistattvaṃ tattvaṃpadanirūpitaḥ । tārakāṃtarasaṃsthānastārakastārakāṃtakaḥ ॥ 90 ॥ sthāṇuḥ sthāṇupriyaḥ sthātā sthāvaraṃ jaṃgamaṃ jagat । dakṣayajñapramathano dātā dānaṃ damo dayā ॥ 91 ॥ dayāvāṃdivyavibhavo daṃḍabhṛddaṃḍanāyakaḥ । daṃtaprabhinnābhramālo daityavāraṇadāraṇaḥ ॥ 92 ॥ daṃṣṭrālagnadvīpaghaṭo devārthanṛgajākṛtiḥ । dhanaṃ dhanapaterbaṃdhurdhanado dharaṇīdharaḥ ॥ 93 ॥ dhyānaikaprakaṭo dhyeyo dhyānaṃ dhyānaparāyaṇaḥ । dhvaniprakṛticītkāro brahmāṃḍāvalimekhalaḥ ॥ 94 ॥ naṃdyo naṃdipriyo nādo nādamadhyapratiṣṭhitaḥ । niṣkalo nirmalo nityo nityānityo nirāmayaḥ ॥ 95 ॥ paraṃ vyoma paraṃ dhāma paramātmā paraṃ padam ॥ 96 ॥ parātparaḥ paśupatiḥ paśupāśavimocanaḥ । pūrṇānaṃdaḥ parānaṃdaḥ purāṇapuruṣottamaḥ ॥ 97 ॥ padmaprasannavadanaḥ praṇatājñānanāśanaḥ । pramāṇapratyayātītaḥ praṇatārtinivāraṇaḥ ॥ 98 ॥ phaṇihastaḥ phaṇipatiḥ phūtkāraḥ phaṇitapriyaḥ । bāṇārcitāṃghriyugalo bālakelikutūhalī । brahma brahmārcitapado brahmacārī bṛhaspatiḥ ॥ 99 ॥ bṛhattamo brahmaparo brahmaṇyo brahmavitpriyaḥ । bṛhannādāgryacītkāro brahmāṃḍāvalimekhalaḥ ॥ 100 ॥ bhrūkṣepadattalakṣmīko bhargo bhadro bhayāpahaḥ । bhagavān bhaktisulabho bhūtido bhūtibhūṣaṇaḥ ॥ 101 ॥ bhavyo bhūtālayo bhogadātā bhrūmadhyagocaraḥ । maṃtro maṃtrapatirmaṃtrī madamatto mano mayaḥ ॥ 102 ॥ mekhalāhīśvaro maṃdagatirmaṃdanibhekṣaṇaḥ । mahābalo mahāvīryo mahāprāṇo mahāmanāḥ ॥ 103 ॥ yajño yajñapatiryajñagoptā yajñaphalapradaḥ । yaśaskaro yogagamyo yājñiko yājakapriyaḥ ॥ 104 ॥ raso rasapriyo rasyo raṃjako rāvaṇārcitaḥ । rājyarakṣākaro ratnagarbho rājyasukhapradaḥ ॥ 105 ॥ lakṣo lakṣapatirlakṣyo layastho laḍḍukapriyaḥ । lāsapriyo lāsyaparo lābhakṛllokaviśrutaḥ ॥ 106 ॥ vareṇyo vahnivadano vaṃdyo vedāṃtagocaraḥ । vikartā viśvataścakṣurvidhātā viśvatomukhaḥ ॥ 107 ॥ vāmadevo viśvanetā vajrivajranivāraṇaḥ । vivasvadbaṃdhano viśvādhāro viśveśvaro vibhuḥ ॥ 108 ॥ śabdabrahma śamaprāpyaḥ śaṃbhuśaktigaṇeśvaraḥ । śāstā śikhāgranilayaḥ śaraṇyaḥ śaṃbareśvaraḥ ॥ 109 ॥ ṣaḍṛtukusumasragvī ṣaḍādhāraḥ ṣaḍakṣaraḥ । saṃsāravaidyaḥ sarvajñaḥ sarvabheṣajabheṣajam ॥ 110 ॥ sṛṣṭisthitilayakrīḍaḥ surakuṃjarabhedakaḥ । siṃdūritamahākuṃbhaḥ sadasadbhaktidāyakaḥ ॥ 111 ॥ sākṣī samudramathanaḥ svayaṃvedyaḥ svadakṣiṇaḥ । svataṃtraḥ satyasaṃkalpaḥ sāmagānarataḥ sukhī ॥ 112 ॥ haṃso hastipiśācīśo havanaṃ havyakavyabhuk । havyaṃ hutapriyo hṛṣṭo hṛllekhāmaṃtramadhyagaḥ ॥ 113 ॥ kṣetrādhipaḥ kṣamābhartā kṣamākṣamaparāyaṇaḥ । kṣiprakṣemakaraḥ kṣemānaṃdaḥ kṣoṇīsuradrumaḥ ॥ 114 ॥ dharmaprado'rthadaḥ kāmadātā saubhāgyavardhanaḥ । vidyāprado vibhavado bhuktimuktiphalapradaḥ ॥ 115 ॥ ābhirūpyakaro vīraśrīprado vijayapradaḥ । sarvavaśyakaro garbhadoṣahā putrapautradaḥ ॥ 116 ॥ medhādaḥ kīrtidaḥ śokahārī daurbhāgyanāśanaḥ । prativādimukhastaṃbho ruṣṭacittaprasādanaḥ ॥ 117 ॥ parābhicāraśamano duḥkhahā baṃdhamokṣadaḥ । lavastruṭiḥ kalā kāṣṭhā nimeṣastatparakṣaṇaḥ ॥ 118 ॥ ghaṭī muhūrtaḥ praharo divā naktamaharniśam । pakṣo māsartvayanābdayugaṃ kalpo mahālayaḥ ॥ 119 ॥ rāśistārā tithiryogo vāraḥ karaṇamaṃśakam । lagnaṃ horā kālacakraṃ meruḥ saptarṣayo dhruvaḥ ॥ 120 ॥ rāhurmaṃdaḥ kavirjīvo budho bhaumaḥ śaśī raviḥ । kālaḥ sṛṣṭiḥ sthitirviśvaṃ sthāvaraṃ jaṃgamaṃ jagat ॥ 121 ॥ bhūrāpo'gnirmarudvyomāhaṃkṛtiḥ prakṛtiḥ pumān । brahmā viṣṇuḥ śivo rudra īśaḥ śaktiḥ sadāśivaḥ ॥ 122 ॥ tridaśāḥ pitaraḥ siddhā yakṣā rakṣāṃsi kinnarāḥ । siddhavidyādharā bhūtā manuṣyāḥ paśavaḥ khagāḥ ॥ 123 ॥ samudrāḥ saritaḥ śailā bhūtaṃ bhavyaṃ bhavodbhavaḥ । sāṃkhyaṃ pātaṃjalaṃ yogaṃ purāṇāni śrutiḥ smṛtiḥ ॥ 124 ॥ vedāṃgāni sadācāro mīmāṃsā nyāyavistaraḥ । āyurvedo dhanurvedo gāṃdharvaṃ kāvyanāṭakam ॥ 125 ॥ vaikhānasaṃ bhāgavataṃ mānuṣaṃ pāṃcarātrakam । śaivaṃ pāśupataṃ kālāmukhaṃbhairavaśāsanam ॥ 126 ॥ śāktaṃ vaināyakaṃ sauraṃ jainamārhatasaṃhitā । sadasadvyaktamavyaktaṃ sacetanamacetanam ॥ 127 ॥ baṃdho mokṣaḥ sukhaṃ bhogo yogaḥ satyamaṇurmahān । svasti huṃphaṭ svadhā svāhā śrauṣaṭ vauṣaṭ vaṣaṇ namaḥ 128 ॥ jñānaṃ vijñānamānaṃdo bodhaḥ saṃvitsamo'samaḥ । eka ekākṣarādhāra ekākṣaraparāyaṇaḥ ॥ 129 ॥ ekāgradhīrekavīra eko'nekasvarūpadhṛk । dvirūpo dvibhujo dvyakṣo dvirado dvīparakṣakaḥ ॥ 130 ॥ dvaimāturo dvivadano dvaṃdvahīno dvayātigaḥ । tridhāmā trikarastretā trivargaphaladāyakaḥ ॥ 131 ॥ triguṇātmā trilokādistriśaktīśastrilocanaḥ । caturvidhavacovṛttiparivṛttipravartakaḥ ॥ 132 ॥ caturbāhuścaturdaṃtaścaturātmā caturbhujaḥ । caturvidhopāyamayaścaturvarṇāśramāśrayaḥ 133 ॥ caturthīpūjanaprītaścaturthītithisaṃbhavaḥ ॥ paṃcākṣarātmā paṃcātmā paṃcāsyaḥ paṃcakṛttamaḥ ॥ 134 ॥ paṃcādhāraḥ paṃcavarṇaḥ paṃcākṣaraparāyaṇaḥ । paṃcatālaḥ paṃcakaraḥ paṃcapraṇavamātṛkaḥ ॥ 135 ॥ paṃcabrahmamayasphūrtiḥ paṃcāvaraṇavāritaḥ । paṃcabhakṣapriyaḥ paṃcabāṇaḥ paṃcaśikhātmakaḥ ॥ 136 ॥ ṣaṭkoṇapīṭhaḥ ṣaṭcakradhāmā ṣaḍgraṃthibhedakaḥ । ṣaḍaṃgadhvāṃtavidhvaṃsī ṣaḍaṃgulamahāhradaḥ ॥ 137 ॥ ṣaṇmukhaḥ ṣaṇmukhabhrātā ṣaṭśaktiparivāritaḥ । ṣaḍvairivargavidhvaṃsī ṣaḍūrmibhayabhaṃjanaḥ ॥ 138 ॥ ṣaṭtarkadūraḥ ṣaṭkarmā ṣaḍguṇaḥ ṣaḍrasāśrayaḥ । saptapātālacaraṇaḥ saptadvīporumaṃḍalaḥ ॥ 139 ॥ saptasvarlokamukuṭaḥ saptasaptivarapradaḥ । saptāṃgarājyasukhadaḥ saptarṣigaṇavaṃditaḥ ॥ 140 ॥ saptacchaṃdonidhiḥ saptahotraḥ saptasvarāśrayaḥ । saptābdhikelikāsāraḥ saptamātṛniṣevitaḥ ॥ 141 ॥ saptacchaṃdo modamadaḥ saptacchaṃdo makhaprabhuḥ । aṣṭamūrtirdhyeyamūrtiraṣṭaprakṛtikāraṇam ॥ 142 ॥ aṣṭāṃgayogaphalabhṛdaṣṭapatrāṃbujāsanaḥ । aṣṭaśaktisamānaśrīraṣṭaiśvaryapravardhanaḥ ॥ 143 ॥ aṣṭapīṭhopapīṭhaśrīraṣṭamātṛsamāvṛtaḥ । aṣṭabhairavasevyo'ṣṭavasuvaṃdyo'ṣṭamūrtibhṛt ॥ 144 ॥ aṣṭacakrasphuranmūrtiraṣṭadravyahaviḥpriyaḥ । aṣṭaśrīraṣṭasāmaśrīraṣṭaiśvaryapradāyakaḥ । navanāgāsanādhyāsī navanidhyanuśāsitaḥ ॥ 145 ॥ navadvārapurāvṛtto navadvāraniketanaḥ । navanāthamahānātho navanāgavibhūṣitaḥ ॥ 146 ॥ navanārāyaṇastulyo navadurgāniṣevitaḥ । navaratnavicitrāṃgo navaśaktiśiroddhṛtaḥ ॥ 147 ॥ daśātmako daśabhujo daśadikpativaṃditaḥ । daśādhyāyo daśaprāṇo daśeṃdriyaniyāmakaḥ ॥ 148 ॥ daśākṣaramahāmaṃtro daśāśāvyāpivigrahaḥ । ekādaśamahārudraiḥstutaścaikādaśākṣaraḥ ॥ 149 ॥ dvādaśadvidaśāṣṭādidordaṃḍāstraniketanaḥ । trayodaśabhidābhinno viśvedevādhidaivatam ॥ 150 ॥ caturdaśeṃdravaradaścaturdaśamanuprabhuḥ । caturdaśādyavidyāḍhyaścaturdaśajagatpatiḥ ॥ 151 ॥ sāmapaṃcadaśaḥ paṃcadaśīśītāṃśunirmalaḥ । tithipaṃcadaśākārastithyā paṃcadaśārcitaḥ ॥ 152 ॥ ṣoḍaśādhāranilayaḥ ṣoḍaśasvaramātṛkaḥ । ṣoḍaśāṃtapadāvāsaḥ ṣoḍaśeṃdukalātmakaḥ ॥ 153 ॥ kalāsaptadaśī saptadaśasaptadaśākṣaraḥ । aṣṭādaśadvīpapatiraṣṭādaśapurāṇakṛt ॥ 154 ॥ aṣṭādaśauṣadhīsṛṣṭiraṣṭādaśavidhiḥ smṛtaḥ । aṣṭādaśalipivyaṣṭisamaṣṭijñānakovidaḥ ॥ 155 ॥ aṣṭādaśānnasaṃpattiraṣṭādaśavijātikṛt । ekaviṃśaḥ pumānekaviṃśatyaṃgulipallavaḥ ॥ 156 ॥ caturviṃśatitattvātmā paṃcaviṃśākhyapūruṣaḥ । saptaviṃśatitāreśaḥ saptaviṃśatiyogakṛt ॥ 157 ॥ dvātriṃśadbhairavādhīśaścatustriṃśanmahāhradaḥ । ṣaṭtriṃśattattvasaṃbhūtiraṣṭatriṃśatkalātmakaḥ ॥ 158 ॥ paṃcāśadviṣṇuśaktīśaḥ paṃcāśanmātṛkālayaḥ । dvipaṃcāśadvapuḥśreṇītriṣaṣṭyakṣarasaṃśrayaḥ । paṃcāśadakṣaraśreṇīpaṃcāśadrudravigrahaḥ ॥ 159 ॥ catuḥṣaṣṭimahāsiddhiyoginīvṛṃdavaṃditaḥ । namadekonapaṃcāśanmarudvarganirargalaḥ ॥ 160 ॥ catuḥṣaṣṭyarthanirṇetā catuḥṣaṣṭikalānidhiḥ । aṣṭaṣaṣṭimahātīrthakṣetrabhairavavaṃditaḥ ॥ 161 ॥ caturnavatimaṃtrātmā ṣaṇṇavatyadhikaprabhuḥ । śatānaṃdaḥ śatadhṛtiḥ śatapatrāyatekṣaṇaḥ ॥ 162 ॥ śatānīkaḥ śatamakhaḥ śatadhārāvarāyudhaḥ । sahasrapatranilayaḥ sahasraphaṇibhūṣaṇaḥ ॥ 163 ॥ sahasraśīrṣā puruṣaḥ sahasrākṣaḥ sahasrapāt । sahasranāmasaṃstutyaḥ sahasrākṣabalāpahaḥ ॥ 164 ॥ daśasāhasraphaṇibhṛtphaṇirājakṛtāsanaḥ । aṣṭāśītisahasrādyamaharṣistotrapāṭhitaḥ ॥ 165 ॥ lakṣādhāraḥ priyādhāro lakṣādhāramanomayaḥ । caturlakṣajapaprītaścaturlakṣaprakāśakaḥ ॥ 166 ॥ caturaśītilakṣāṇāṃ jīvānāṃ dehasaṃsthitaḥ । koṭisūryapratīkāśaḥ koṭicaṃdrāṃśunirmalaḥ ॥ 167 ॥ śivodbhavādyaṣṭakoṭivaināyakadhuraṃdharaḥ । saptakoṭimahāmaṃtramaṃtritāvayavadyutiḥ ॥ 168 ॥ trayastriṃśatkoṭisuraśreṇīpraṇatapādukaḥ । anaṃtadevatāsevyo hyanaṃtaśubhadāyakaḥ ॥ 169 ॥ anaṃtanāmānaṃtaśrīranaṃto'naṃtasaukhyadaḥ । anaṃtaśaktisahito hyanaṃtamunisaṃstutaḥ ॥ 170 ॥ iti vaināyakaṃ nāmnāṃ sahasramidamīritam । idaṃ brāhme muhūrte yaḥ paṭhati pratyahaṃ naraḥ ॥ 171 ॥ karasthaṃ tasya sakalamaihikāmuṣmikaṃ sukham । āyurārogyamaiśvaryaṃ dhairyaṃ śauryaṃ balaṃ yaśaḥ ॥ 172 ॥ medhā prajñā dhṛtiḥ kāṃtiḥ saubhāgyamabhirūpatā । satyaṃ dayā kṣamā śāṃtirdākṣiṇyaṃ dharmaśīlatā ॥ 173 ॥ jagatsaṃvananaṃ viśvasaṃvādo vedapāṭavam । sabhāpāṃḍityamaudāryaṃ gāṃbhīryaṃ brahmavarcasam ॥ 174 ॥ ojastejaḥ kulaṃ śīlaṃ pratāpo vīryamāryatā । jñānaṃ vijñānamāstikyaṃ sthairyaṃ viśvāsatā tathā ॥ 175 ॥ dhanadhānyādivṛddhiśca sakṛdasya japādbhavet । vaśyaṃ caturvidhaṃ viśvaṃ japādasya prajāyate ॥ 176 ॥ rājño rājakalatrasya rājaputrasya maṃtriṇaḥ । japyate yasya vaśyārthe sa dāsastasya jāyate ॥ 177 ॥ dharmārthakāmamokṣāṇāmanāyāsena sādhanam । śākinīḍākinīrakṣoyakṣagrahabhayāpaham ॥ 178 ॥ sāmrājyasukhadaṃ sarvasapatnamadamardanam । samastakalahadhvaṃsi dagdhabījaprarohaṇam ॥ 179 ॥ duḥsvapnaśamanaṃ kruddhasvāmicittaprasādanam । ṣaḍvargāṣṭamahāsiddhitrikālajñānakāraṇam ॥ 180 ॥ parakṛtyapraśamanaṃ paracakrapramardanam । saṃgrāmamārge saveṣāmidamekaṃ jayāvaham ॥ 181 ॥ sarvavaṃdhyatvadoṣaghnaṃ garbharakṣaikakāraṇam । paṭhyate pratyahaṃ yatra stotraṃ gaṇapateridam ॥ 182 ॥ deśe tatra na durbhikṣamītayo duritāni ca । na tadgehaṃ jahāti śrīryatrāyaṃ japyate stavaḥ ॥ 183 ॥ kṣayakuṣṭhapramehārśabhagaṃdaraviṣūcikāḥ । gulmaṃ plīhānamaśamānamatisāraṃ mahodaram ॥ 184 ॥ kāsaṃ śvāsamudāvartaṃ śūlaṃ śophāmayodaram । śirorogaṃ vamiṃ hikkāṃ gaṃḍamālāmarocakam ॥ 185 ॥ vātapittakaphadvaṃdvatridoṣajanitajvaram । āgaṃtuviṣamaṃ śītamuṣṇaṃ caikāhikādikam ॥ 186 ॥ ityādyuktamanuktaṃ vā rogadoṣādisaṃbhavam । sarvaṃ praśamayatyāśu stotrasyāsya sakṛjjapaḥ ॥ 187 ॥ prāpyate'sya japātsiddhiḥ strīśūdraiḥ patitairapi । sahasranāmamaṃtro'yaṃ japitavyaḥ śubhāptaye ॥ 188 ॥ mahāgaṇapateḥ stotraṃ sakāmaḥ prajapannidam । icchayā sakalān bhogānupabhujyeha pārthivān ॥ 189 ॥ manorathaphalairdivyairvyomayānairmanoramaiḥ । caṃdreṃdrabhāskaropeṃdrabrahmaśarvādisadmasu ॥ 190 ॥ kāmarūpaḥ kāmagatiḥ kāmadaḥ kāmadeśvaraḥ । bhuktvā yathepsitānbhogānabhīṣṭaiḥ saha baṃdhubhiḥ ॥ 191 ॥ gaṇeśānucaro bhūtvā gaṇo gaṇapatipriyaḥ । naṃdīśvarādisānaṃdairnaṃditaḥ sakalairgaṇaiḥ ॥ 192 ॥ śivābhyāṃ kṛpayā putranirviśeṣaṃ ca lālitaḥ । śivabhaktaḥ pūrṇakāmo gaṇeśvaravarātpunaḥ ॥ 193 ॥ jātismaro dharmaparaḥ sārvabhaumo'bhijāyate । niṣkāmastu japannityaṃ bhaktyā vighneśatatparaḥ ॥ 194 ॥ yogasiddhiṃ parāṃ prāpya jñānavairāgyasaṃyutaḥ । niraṃtare nirābādhe paramānaṃdasaṃjñite ॥ 195 ॥ viśvottīrṇe pare pūrṇe punarāvṛttivarjite । līno vaināyake dhāmni ramate nityanirvṛte ॥ 196 ॥ yo nāmabhirhutairdattaiḥ pūjayedarcaye​ennaraḥ । rājāno vaśyatāṃ yāṃti ripavo yāṃti dāsatām ॥ 197 ॥ tasya sidhyaṃti maṃtrāṇāṃ durlabhāśceṣṭasiddhayaḥ । mūlamaṃtrādapi stotramidaṃ priyatamaṃ mama ॥ 198 ॥ nabhasye māsi śuklāyāṃ caturthyāṃ mama janmani । dūrvābhirnāmabhiḥ pūjāṃ tarpaṇaṃ vidhivaccaret ॥ 199 ॥ aṣṭadravyairviśeṣeṇa kuryādbhaktisusaṃyutaḥ । tasyepsitaṃ dhanaṃ dhānyamaiśvaryaṃ vijayo yaśaḥ ॥ 200 ॥ bhaviṣyati na saṃdehaḥ putrapautrādikaṃ sukham । idaṃ prajapitaṃ stotraṃ paṭhitaṃ śrāvitaṃ śrutam ॥ 201 ॥ vyākṛtaṃ carcitaṃ dhyātaṃ vimṛṣṭamabhivaṃditam । ihāmutra ca viśveṣāṃ viśvaiśvaryapradāyakam ॥ 202 ॥ svacchaṃdacāriṇāpyeṣa yena saṃdhāryate stavaḥ । sa rakṣyate śivodbhūtairgaṇairadhyaṣṭakoṭibhiḥ ॥ 203 ॥ likhitaṃ pustakastotraṃ maṃtrabhūtaṃ prapūjayet । tatra sarvottamā lakṣmīḥ sannidhatte niraṃtaram ॥ 204 ॥ dānairaśeṣairakhilairvrataiśca tīrthairaśeṣairakhilairmakhaiśca । na tatphalaṃ viṃdati yadgaṇeśasahasranāmasmaraṇena sadyaḥ ॥ 205 ॥ etannāmnāṃ sahasraṃ paṭhati dinamaṇau pratyahaṃprojjihāne sāyaṃ madhyaṃdine vā triṣavaṇamathavā saṃtataṃ vā jano yaḥ । sa syādaiśvaryadhuryaḥ prabhavati vacasāṃ kīrtimuccaistanoti dāridryaṃ haṃti viśvaṃ vaśayati suciraṃ vardhate putrapautraiḥ ॥ 206 ॥ akiṃcanopyekacitto niyato niyatāsanaḥ । prajapaṃścaturo māsān gaṇeśārcanatatparaḥ ॥ 207 ॥ daridratāṃ samunmūlya saptajanmānugāmapi । labhate mahatīṃ lakṣmīmityājñā pārameśvarī ॥ 208 ॥ āyuṣyaṃ vītarogaṃ kulamativimalaṃ saṃpadaścārtināśaḥ kīrtirnityāvadātā bhavati khalu navā kāṃtiravyājabhavyā । putrāḥ saṃtaḥ kalatraṃ guṇavadabhimataṃ yadyadanyacca tatta - nnityaṃ yaḥ stotrametat paṭhati gaṇapatestasya haste samastam ॥ 209 ॥ gaṇaṃjayo gaṇapatirheraṃbo dharaṇīdharaḥ । mahāgaṇapatirbuddhipriyaḥ kṣipraprasādanaḥ ॥ 210 ॥ amoghasiddhiramṛtamaṃtraściṃtāmaṇirnidhiḥ । sumaṃgalo bījamāśāpūrako varadaḥ kalaḥ ॥ 211 ॥ kāśyapo naṃdano vācāsiddho ḍhuṃḍhirvināyakaḥ । modakairebhiratraikaviṃśatyā nāmabhiḥ pumān ॥ 212 ॥ upāyanaṃ dadedbhaktyā matprasādaṃ cikīrṣati । vatsaraṃ vighnarājo'sya tathyamiṣṭārthasiddhaye ॥ 213 ॥ yaḥ stauti madgatamanā mamārādhanatatparaḥ । stuto nāmnā sahasreṇa tenāhaṃ nātra saṃśayaḥ ॥ 214 ॥ namo namaḥ suravarapūjitāṃghraye namo namo nirupamamaṃgalātmane । namo namo vipuladayaikasiddhaye namo namaḥ karikalabhānanāya te ॥ 215 ॥ kiṃkiṇīgaṇaracitacaraṇaḥ prakaṭitagurumitacārukaraṇaḥ । madajalalaharīkalitakapolaḥ śamayatu duritaṃ gaṇapatināmnā ॥ 216 ॥ ॥ iti śrīgaṇeśapurāṇe upāsanākhaṇḍe mahāgaṇapatiproktaṃ śrīmahāgaṇapati sahasranāmastotraṃ sampūrṇam ॥