ബ്രഹ്മവിഷ്ണുമഹേശാ ഊചുഃ – അജം നിർവികല്പം നിരാകാരമേകം നിരാനന്ദമദ്വൈതമാനന്ദപൂർണം । പരം നിർഗുണം നിർവിശേഷം നിരീഹം പരബ്രഹ്മരൂപം ഗണേശം ഭജേമ ॥ 1 ॥ ഗുണാതീതമാദ്യം ചിദാനന്ദരൂപം ചിദാഭാസകം സർവഗം ജ്ഞാനഗമ്യം । മുനിധ്യേയമാകാശരൂപം പരേശം പരബ്രഹ്മരൂപം ഗണേശം ഭജേമ ॥ 2 ॥ ജഗത്കാരണം കാരണജ്ഞാനരൂപം സുരാദിം സുഖാദിം യുഗാദിം ഗണേശം । ജഗദ്വ്യാപിനം വിശ്വവന്ദ്യം സുരേശം പരബ്രഹ്മരൂപം ഗണേശം ഭജേമ ॥ 3 ॥ രജോയോഗതോ ബ്രഹ്മരൂപം ശ്രുതിജ്ഞം സദാ കാര്യസക്തം ഹൃദാചിന്ത്യരൂപം । ജഗത്കാരകം സർവവിദ്യാനിധാനം പരബ്രഹ്മരൂപം ഗണേശം നതാസ്മഃ ॥ 4 ॥ സദാ സത്ത്വയോഗം മുദാ ക്രീഡമാനം സുരാരീൻഹരന്തം ജഗത്പാലയന്തം । അനേകാവതാരം നിജജ്ഞാനഹാരം സദാ വിഷ്ണുരൂപം ഗണേശം നമാമഃ ॥ 5 ॥ തമോയോഗിനം രുദ്രരൂപം ത്രിനേത്രം ജഗദ്ധാരകം താരകം ജ്ഞാനഹേതും । അനേകാഗമൈഃ സ്വം ജനം ബോധയന്തം സദാ ശർവരൂപം ഗണേശം നമാമഃ ॥ 6 ॥ തമസ്തോമഹാരം ജനാജ്ഞാനഹാരം ത്രയീവേദസാരം പരബ്രഹ്മപാരം । മുനിജ്ഞാനകാരം വിദൂരേവികാരം സദാ ബ്രഹ്മരൂപം ഗണേശം നമാമഃ ॥ 7 ॥ നിജൈരോഷധീസ്തർപയന്തം കരോദ്യൈഃ സരൗഘാൻകലാഭിഃ സുധാസ്രാവിണീഭിഃ । ദിനേശാംശു സന്താപഹാരം ദ്വിജേശം ശശാങ്കസ്വരൂപം ഗണേശം നമാമഃ ॥ 8 ॥ പ്രകാശസ്വരൂപം നഭോവായുരൂപം വികാരാദിഹേതും കലാകാലഭൂതം । അനേകക്രിയാനേകശക്തിസ്വരൂപം സദാ ശക്തിരൂപം ഗണേശം നമാമഃ ॥ 9 ॥ പ്രധാനസ്വരൂപം മഹത്തത്ത്വരൂപം ധരാവാരിരൂപം ദിഗീശാദിരൂപം । അസത്സത്സ്വരൂപം ജഗദ്ധേതുഭൂതം സദാ വിശ്വരൂപം ഗണേശം നതാസ്മഃ ॥ 10 ॥ ത്വദീയേ മനഃ സ്ഥാപയേദംഘ്രിയുഗ്മേ ജനോ വിഘ്നസംഘാന്ന പീഡാം ലഭേത । ലസത്സൂര്യബിംബേ വിശാലേ സ്ഥിതോഽയം ജനോധ്വാന്ത പീഡാം കഥം വാ ലഭേത ॥ 11 ॥ വയം ഭ്രാമിതാഃ സർവഥാഽജ്ഞാനയോഗാ- -ദലബ്ധാ തവാംഘ്രിം ബഹൂന്വർഷപൂഗാൻ । ഇദാനീമവാപ്താസ്തവൈവ പ്രസാദാ- -ത്പ്രപന്നാൻസദാ പാഹി വിശ്വംഭരാദ്യ ॥ 12 ॥ ഗണേശ ഉവാച – ഇദം യഃ പഠേത്പ്രാതരുത്ഥായ ധീമാൻ ത്രിസന്ധ്യം സദാ ഭക്തിയുക്തോ വിശുദ്ധഃ । സപുത്രാൻ ശ്രിയം സർവകാമാൻ ലഭേത പരബ്രഹ്മരൂപോ ഭവേദന്തകാലേ ॥ 13 ॥ ഇതി ഗണേശപുരാണേ ഉപാസനാഖണ്ഡേ ത്രയോദശോഽധ്യായേ ശ്രീഗണപതിസ്തവഃ ।