അയി ഗിരിനന്ദിനി നന്ദിതമേദിനി വിശ്വവിനോദിനി നന്ദിനുതേ ഗിരിവരവിന്ധ്യശിരോധിനിവാസിനി വിഷ്ണുവിലാസിനി ജിഷ്ണുനുതേ । ഭഗവതി ഹേ ശിതികണ്ഠകുടുംബിനി ഭൂരികുടുംബിനി ഭൂരികൃതേ ജയ ജയ ഹേ മഹിഷാസുരമർദിനി രമ്യകപർദിനി ശൈലസുതേ ॥ 1 ॥ സുരവരവർഷിണി ദുർധരധർഷിണി ദുർമുഖമർഷിണി ഹർഷരതേ ത്രിഭുവനപോഷിണി ശങ്കരതോഷിണി കല്മഷമോഷിണി ഘോരരതേ । ദനുജനിരോഷിണി ദിതിസുതരോഷിണി ദുർമദശോഷിണി സിന്ധുസുതേ ജയ ജയ ഹേ മഹിഷാസുരമർദിനി രമ്യകപർദിനി ശൈലസുതേ ॥ 2 ॥ അയി ജഗദംബ മദംബ കദംബവനപ്രിയവാസിനി ഹാസരതേ ശിഖരിശിരോമണിതുംഗഹിമാലയശൃംഗനിജാലയമധ്യഗതേ । മധുമധുരേ മധുകൈടഭഗഞ്ജിനി കൈടഭഭഞ്ജിനി രാസരതേ ജയ ജയ ഹേ മഹിഷാസുരമർദിനി രമ്യകപർദിനി ശൈലസുതേ ॥ 3 ॥ അയി ശതഖണ്ഡ വിഖണ്ഡിതരുണ്ഡ വിതുണ്ഡിതശുണ്ഡ ഗജാധിപതേ രിപുഗജഗണ്ഡ വിദാരണചണ്ഡ പരാക്രമശുണ്ഡ മൃഗാധിപതേ । നിജഭുജദണ്ഡ നിപാതിതഖണ്ഡവിപാതിതമുണ്ഡഭടാധിപതേ ജയ ജയ ഹേ മഹിഷാസുരമർദിനി രമ്യകപർദിനി ശൈലസുതേ ॥ 4 ॥ അയി രണദുർമദ ശത്രുവധോദിത ദുർധരനിർജര ശക്തിഭൃതേ ചതുരവിചാരധുരീണ മഹാശിവ ദൂതകൃത പ്രമഥാധിപതേ । ദുരിതദുരീഹദുരാശയദുർമതിദാനവദൂതകൃതാന്തമതേ ജയ ജയ ഹേ മഹിഷാസുരമർദിനി രമ്യകപർദിനി ശൈലസുതേ ॥ 5 ॥ അയി ശരണാഗതവൈരിവധൂവര വീരവരാഭയദായകരേ ത്രിഭുവന മസ്തക ശൂലവിരോധിശിരോധികൃതാമല ശൂലകരേ । ദുമിദുമിതാമര ദുന്ദുഭിനാദ മഹോ മുഖരീകൃത തിഗ്മകരേ ജയ ജയ ഹേ മഹിഷാസുരമർദിനി രമ്യകപർദിനി ശൈലസുതേ ॥ 6 ॥ അയി നിജഹുങ്കൃതിമാത്ര നിരാകൃത ധൂമ്രവിലോചന ധൂമ്രശതേ സമരവിശോഷിത ശോണിതബീജ സമുദ്ഭവശോണിത ബീജലതേ । ശിവ ശിവ ശുംഭ നിശുംഭ മഹാഹവ തർപിത ഭൂത പിശാചരതേ ജയ ജയ ഹേ മഹിഷാസുരമർദിനി രമ്യകപർദിനി ശൈലസുതേ ॥ 7 ॥ ധനുരനുസംഗ രണക്ഷണസംഗ പരിസ്ഫുരദംഗ നടത്കടകേ കനക പിശംഗപൃഷത്കനിഷംഗരസദ്ഭട ശൃംഗ ഹതാവടുകേ । കൃതചതുരംഗ ബലക്ഷിതിരംഗ ഘടദ്ബഹുരംഗ രടദ്ബടുകേ ജയ ജയ ഹേ മഹിഷാസുരമർദിനി രമ്യകപർദിനി ശൈലസുതേ ॥ 8 ॥ സുരലലനാ തതഥേയി തഥേയി കൃതാഭിനയോദര നൃത്യരതേ കൃത കുകുഥഃ കുകുഥോ ഗഡദാദികതാല കുതൂഹല ഗാനരതേ । ധുധുകുട ധുക്കുട ധിന്ധിമിത ധ്വനി ധീര മൃദംഗ നിനാദരതേ ജയ ജയ ഹേ മഹിഷാസുരമർദിനി രമ്യകപർദിനി ശൈലസുതേ ॥ 9 ॥ ജയ ജയ ജപ്യ ജയേ ജയ ശബ്ദപരസ്തുതി തത്പര വിശ്വനുതേ ഭണ ഭണ ഭിഞ്ജിമി ഭിങ്കൃതനൂപുര സിഞ്ജിതമോഹിത ഭൂതപതേ । നടിതനടാർധ നടീനടനായക നാടിതനാട്യ സുഗാനരതേ ജയ ജയ ഹേ മഹിഷാസുരമർദിനി രമ്യകപർദിനി ശൈലസുതേ ॥ 10 ॥ അയി സുമനഃ സുമനഃ സുമനഃ സുമനഃ സുമനോഹര കാന്തിയുതേ ശ്രിത രജനീ രജനീ രജനീ രജനീ രജനീകര വക്ത്രവൃതേ । സുനയന വിഭ്രമര ഭ്രമര ഭ്രമര ഭ്രമര ഭ്രമരാധിപതേ ജയ ജയ ഹേ മഹിഷാസുരമർദിനി രമ്യകപർദിനി ശൈലസുതേ ॥ 11 ॥ സഹിത മഹാഹവ മല്ലമ തല്ലിക മല്ലിത രല്ലക മല്ലരതേ വിരചിത വല്ലിക പല്ലിക മല്ലിക ഭില്ലിക ഭില്ലിക വർഗ വൃതേ । സിതകൃത ഫുല്ലസമുല്ലസിതാരുണ തല്ലജ പല്ലവ സല്ലലിതേ ജയ ജയ ഹേ മഹിഷാസുരമർദിനി രമ്യകപർദിനി ശൈലസുതേ ॥ 12 ॥ അവിരലഗണ്ഡഗലന്മദമേദുര മത്തമതംഗജ രാജപതേ ത്രിഭുവനഭൂഷണഭൂതകലാനിധി രൂപപയോനിധി രാജസുതേ । അയി സുദതീജന ലാലസമാനസ മോഹനമന്മഥ രാജസുതേ ജയ ജയ ഹേ മഹിഷാസുരമർദിനി രമ്യകപർദിനി ശൈലസുതേ ॥ 13 ॥ കമലദലാമല കോമലകാന്തി കലാകലിതാമല ഭാലലതേ സകലവിലാസകലാനിലയ ക്രമകേലിചലത്കലഹംസകുലേ । അലികുല സങ്കുല കുവലയ മണ്ഡല മൗലിമിലദ്ഭകുലാലി കുലേ ജയ ജയ ഹേ മഹിഷാസുരമർദിനി രമ്യകപർദിനി ശൈലസുതേ ॥ 14 ॥ കരമുരലീരവവീജിതകൂജിത ലജ്ജിതകോകില മഞ്ജുമതേ മിലിത പുലിന്ദ മനോഹര ഗുഞ്ജിത രഞ്ജിതശൈല നികുഞ്ജഗതേ । നിജഗുണഭൂത മഹാശബരീഗണ സദ്ഗുണസംഭൃത കേലിതലേ ജയ ജയ ഹേ മഹിഷാസുരമർദിനി രമ്യകപർദിനി ശൈലസുതേ ॥ 15 ॥ കടിതടപീത ദുകൂലവിചിത്ര മയൂഖതിരസ്കൃത ചന്ദ്രരുചേ പ്രണതസുരാസുര മൗലിമണിസ്ഫുരദംശുലസന്നഖ ചന്ദ്രരുചേ । ജിതകനകാചല മൗലിപദോർജിത നിർഭരകുഞ്ജര കുംഭകുചേ ജയ ജയ ഹേ മഹിഷാസുരമർദിനി രമ്യകപർദിനി ശൈലസുതേ ॥ 16 ॥ വിജിത സഹസ്രകരൈക സഹസ്രകരൈക സഹസ്രകരൈകനുതേ കൃത സുരതാരക സംഗരതാരക സംഗരതാരക സൂനുസുതേ । സുരഥസമാധി സമാനസമാധി സമാധിസമാധി സുജാതരതേ ജയ ജയ ഹേ മഹിഷാസുരമർദിനി രമ്യകപർദിനി ശൈലസുതേ ॥ 17 ॥ പദകമലം കരുണാനിലയേ വരിവസ്യതി യോഽനുദിനം സ ശിവേ അയി കമലേ കമലാനിലയേ കമലാനിലയഃ സ കഥം ന ഭവേത് । തവ പദമേവ പരമ്പദമിത്യനുശീലയതോ മമ കിം ന ശിവേ ജയ ജയ ഹേ മഹിഷാസുരമർദിനി രമ്യകപർദിനി ശൈലസുതേ ॥ 18 ॥ കനകലസത്കല സിന്ധുജലൈരനുസിഞ്ചിനുതേഗുണരംഗഭുവം ഭജതി സ കിം ന ശചീകുചകുംഭ തടീപരിരംഭ സുഖാനുഭവം । തവ ചരണം ശരണം കരവാണി നതാമരവാണി നിവാസി ശിവം ജയ ജയ ഹേ മഹിഷാസുരമർദിനി രമ്യകപർദിനി ശൈലസുതേ ॥ 19 ॥ തവ വിമലേന്ദുകുലം വദനേന്ദുമലം സകലം നനു കൂലയതേ കിമു പുരുഹൂത പുരീന്ദുമുഖീ സുമുഖീഭിരസൗ വിമുഖീക്രിയതേ । മമ തു മതം ശിവനാമധനേ ഭവതീ കൃപയാ കിമുത ക്രിയതേ ജയ ജയ ഹേ മഹിഷാസുരമർദിനി രമ്യകപർദിനി ശൈലസുതേ ॥ 20 ॥ അയി മയി ദീനദയാലുതയാ കൃപയൈവ ത്വയാ ഭവിതവ്യമുമേ അയി ജഗതോ ജനനീ കൃപയാസി യഥാസി തഥാഽനുഭിതാസിരതേ । യദുചിതമത്ര ഭവത്യുരരി കുരുതാദുരുതാപമപാകുരു തേ [മേ] ജയ ജയ ഹേ മഹിഷാസുരമർദിനി രമ്യകപർദിനി ശൈലസുതേ ॥ 21 ॥ ഇതി ശ്രീ മഹിഷാസുരമർദിനി സ്തോത്രം ॥