ന്യാസഃ – അസ്യ ശ്രീ ചണ്ഡീ കവചസ്യ । ബ്രഹ്മാ ഋഷിഃ । അനുഷ്ടുപ് ഛന്ദഃ । ചാമുണ്ഡാ ദേവതാ । അംഗന്യാസോക്ത മാതരോ ബീജം । നവാവരണോ മന്ത്രശക്തിഃ । ദിഗ്ബന്ധ ദേവതാഃ തത്വം । ശ്രീ ജഗദംബാ പ്രീത്യർഥേ സപ്തശതീ പാഠാംഗത്വേന ജപേ വിനിയോഗഃ ॥ ഓം നമശ്ചണ്ഡികായൈ മാർകണ്ഡേയ ഉവാച – ഓം യദ്ഗുഹ്യം പരമം ലോകേ സർവരക്ഷാകരം നൃണാം । യന്ന കസ്യചിദാഖ്യാതം തന്മേ ബ്രൂഹി പിതാമഹ ॥ 1 ॥ ബ്രഹ്മോവാച – അസ്തി ഗുഹ്യതമം വിപ്ര സർവഭൂതോപകാരകം । ദേവ്യാസ്തു കവചം പുണ്യം തച്ഛൃണുഷ്വ മഹാമുനേ ॥ 2 ॥ പ്രഥമം ശൈലപുത്രീ ച ദ്വിതീയം ബ്രഹ്മചാരിണീ । തൃതീയം ചന്ദ്രഘണ്ടേതി കൂഷ്മാണ്ഡേതി ചതുർഥകം ॥ 3 ॥ പഞ്ചമം സ്കന്ദമാതേതി ഷഷ്ഠം കാത്യായനീതി ച । സപ്തമം കാലരാത്രീതി മഹാഗൗരീതി ചാഷ്ടമം ॥ 4 ॥ നവമം സിദ്ധിദാത്രീ ച നവദുർഗാഃ പ്രകീർതിതാഃ । ഉക്താന്യേതാനി നാമാനി ബ്രഹ്മണൈവ മഹാത്മനാ ॥ 5 ॥ അഗ്നിനാ ദഹ്യമാനസ്തു ശത്രുമധ്യേ ഗതോ രണേ । വിഷമേ ദുർഗമേ ചൈവ ഭയാർതാഃ ശരണം ഗതാഃ ॥ 6 ॥ ന തേഷാം ജായതേ കിഞ്ചിദശുഭം രണസങ്കടേ । നാപദം തസ്യ പശ്യാമി ശോകദുഃഖഭയം ന ഹി ॥ 7 ॥ യൈസ്തു ഭക്ത്യാ സ്മൃതാ നൂനം തേഷാം വൃദ്ധിഃ പ്രജായതേ । യേ ത്വാം സ്മരന്തി ദേവേശി രക്ഷസേ താന്നസംശയഃ ॥ 8 ॥ പ്രേതസംസ്ഥാ തു ചാമുണ്ഡാ വാരാഹീ മഹിഷാസനാ । ഐന്ദ്രീ ഗജസമാരൂഢാ വൈഷ്ണവീ ഗരുഡാസനാ ॥ 9 ॥ മാഹേശ്വരീ വൃഷാരൂഢാ കൗമാരീ ശിഖിവാഹനാ । ലക്ഷ്മീഃ പദ്മാസനാ ദേവീ പദ്മഹസ്താ ഹരിപ്രിയാ ॥ 10 ॥ ശ്വേതരൂപധരാ ദേവീ ഈശ്വരീ വൃഷവാഹനാ । ബ്രാഹ്മീ ഹംസസമാരൂഢാ സർവാഭരണഭൂഷിതാ ॥ 11 ॥ ഇത്യേതാ മാതരഃ സർവാഃ സർവയോഗസമന്വിതാഃ । നാനാഭരണാശോഭാഢ്യാ നാനാരത്നോപശോഭിതാഃ ॥ 12 ॥ ദൃശ്യന്തേ രഥമാരൂഢാ ദേവ്യഃ ക്രോധസമാകുലാഃ । ശംഖം ചക്രം ഗദാം ശക്തിം ഹലം ച മുസലായുധം ॥ 13 ॥ ഖേടകം തോമരം ചൈവ പരശും പാശമേവ ച । കുന്തായുധം ത്രിശൂലം ച ശാർങ്ഗമായുധമുത്തമം ॥ 14 ॥ ദൈത്യാനാം ദേഹനാശായ ഭക്താനാമഭയായ ച । ധാരയന്ത്യായുധാനീത്ഥം ദേവാനാം ച ഹിതായ വൈ ॥ 15 ॥ നമസ്തേഽസ്തു മഹാരൗദ്രേ മഹാഘോരപരാക്രമേ । മഹാബലേ മഹോത്സാഹേ മഹാഭയവിനാശിനി ॥ 16 ॥ ത്രാഹി മാം ദേവി ദുഷ്പ്രേക്ഷ്യേ ശത്രൂണാം ഭയവർധിനി । പ്രാച്യാം രക്ഷതു മാമൈന്ദ്രീ ആഗ്നേയ്യാമഗ്നിദേവതാ ॥ 17 ॥ ദക്ഷിണേഽവതു വാരാഹീ നൈരൃത്യാം ഖഡ്ഗധാരിണീ । പ്രതീച്യാം വാരുണീ രക്ഷേദ്വായവ്യാം മൃഗവാഹിനീ ॥ 18 ॥ ഉദീച്യാം പാതു കൗമാരീ ഐശാന്യാം ശൂലധാരിണീ । ഊർധ്വം ബ്രഹ്മാണീ മേ രക്ഷേദധസ്താദ്വൈഷ്ണവീ തഥാ ॥ 19 ॥ ഏവം ദശ ദിശോ രക്ഷേച്ചാമുണ്ഡാ ശവവാഹനാ । ജയാ മേ ചാഗ്രതഃ പാതു വിജയാ പാതു പൃഷ്ഠതഃ ॥ 20 ॥ അജിതാ വാമപാർശ്വേ തു ദക്ഷിണേ ചാപരാജിതാ । ശിഖാമുദ്യോതിനീ രക്ഷേദുമാ മൂർധ്നി വ്യവസ്ഥിതാ ॥ 21 ॥ മാലാധരീ ലലാടേ ച ഭ്രുവൗ രക്ഷേദ്യശസ്വിനീ । ത്രിനേത്രാ ച ഭ്രുവോർമധ്യേ യമഘണ്ടാ ച നാസികേ ॥ 22 ॥ ശംഖിനീ ചക്ഷുഷോർമധ്യേ ശ്രോത്രയോർദ്വാരവാസിനീ । കപോലൗ കാലികാ രക്ഷേത്കർണമൂലേ തു ശാങ്കരീ ॥ 23 ॥ നാസികായാം സുഗന്ധാ ച ഉത്തരോഷ്ഠേ ച ചർചികാ । അധരേ ചാമൃതകലാ ജിഹ്വായാം ച സരസ്വതീ ॥ 24 ॥ ദന്താൻ രക്ഷതു കൗമാരീ കണ്ഠദേശേ തു ചണ്ഡികാ । ഘണ്ടികാം ചിത്രഘണ്ടാ ച മഹാമായാ ച താലുകേ ॥ 25 ॥ കാമാക്ഷീ ചിബുകം രക്ഷേദ്വാചം മേ സർവമംഗലാ । ഗ്രീവായാം ഭദ്രകാലീ ച പൃഷ്ഠവംശേ ധനുർധരീ ॥ 26 ॥ നീലഗ്രീവാ ബഹിഃ കണ്ഠേ നലികാം നലകൂബരീ । സ്കന്ധയോഃ ഖഡ്ഗിനീ രക്ഷേദ്ബാഹൂ മേ വജ്രധാരിണീ ॥ 27 ॥ ഹസ്തയോർദണ്ഡിനീ രക്ഷേദംബികാ ചാംഗുലീഷു ച । നഖാഞ്ഛൂലേശ്വരീ രക്ഷേത്കുക്ഷൗ രക്ഷേത്കുലേശ്വരീ ॥ 28 ॥ സ്തനൗ രക്ഷേന്മഹാദേവീ മനഃശോകവിനാശിനീ । ഹൃദയേ ലലിതാ ദേവീ ഉദരേ ശൂലധാരിണീ ॥ 29 ॥ നാഭൗ ച കാമിനീ രക്ഷേദ്ഗുഹ്യം ഗുഹ്യേശ്വരീ തഥാ । പൂതനാ കാമികാ മേഢ്രം ഗുദേ മഹിഷവാഹിനീ ॥ 30 ॥ കട്യാം ഭഗവതീ രക്ഷേജ്ജാനുനീ വിന്ധ്യവാസിനീ । ജംഘേ മഹാബലാ രക്ഷേത്സർവകാമപ്രദായിനീ ॥ 31 ॥ ഗുൽഫയോർനാരസിംഹീ ച പാദപൃഷ്ഠേ തു തൈജസീ । പാദാംഗുലീഷു ശ്രീ രക്ഷേത്പാദാധസ്തലവാസിനീ ॥ 32 ॥ നഖാൻ ദംഷ്ട്രകരാലീ ച കേശാംശ്ചൈവോർധ്വകേശിനീ । രോമകൂപേഷു കൗമാരീ ത്വചം വാഗീശ്വരീ തഥാ ॥ 33 ॥ രക്തമജ്ജാവസാമാംസാന്യസ്ഥിമേദാംസി പാർവതീ । അന്ത്രാണി കാലരാത്രിശ്ച പിത്തം ച മുകുടേശ്വരീ ॥ 34 ॥ പദ്മാവതീ പദ്മകോശേ കഫേ ചൂഡാമണിസ്തഥാ । ജ്വാലാമുഖീ നഖജ്വാലാമഭേദ്യാ സർവസന്ധിഷു ॥ 35 ॥ ശുക്രം ബ്രഹ്മാണി! മേ രക്ഷേച്ഛായാം ഛത്രേശ്വരീ തഥാ । അഹങ്കാരം മനോ ബുദ്ധിം രക്ഷേന്മേ ധർമധാരിണീ ॥ 36 ॥ പ്രാണാപാനൗ തഥാ വ്യാനമുദാനം ച സമാനകം । വജ്രഹസ്താ ച മേ രക്ഷേത്പ്രാണം കല്യാണശോഭനാ ॥ 37 ॥ രസേ രൂപേ ച ഗന്ധേ ച ശബ്ദേ സ്പർശേ ച യോഗിനീ । സത്ത്വം രജസ്തമശ്ചൈവ രക്ഷേന്നാരായണീ സദാ ॥ 38 ॥ ആയൂ രക്ഷതു വാരാഹീ ധർമം രക്ഷതു വൈഷ്ണവീ । യശഃ കീർതിം ച ലക്ഷ്മീം ച ധനം വിദ്യാം ച ചക്രിണീ ॥ 39 ॥ ഗോത്രമിന്ദ്രാണി! മേ രക്ഷേത്പശൂന്മേ രക്ഷ ചണ്ഡികേ । പുത്രാൻ രക്ഷേന്മഹാലക്ഷ്മീർഭാര്യാം രക്ഷതു ഭൈരവീ ॥ 40 ॥ പന്ഥാനം സുപഥാ രക്ഷേന്മാർഗം ക്ഷേമകരീ തഥാ । രാജദ്വാരേ മഹാലക്ഷ്മീർവിജയാ സർവതഃ സ്ഥിതാ ॥ 41 ॥ രക്ഷാഹീനം തു യത്-സ്ഥാനം വർജിതം കവചേന തു । തത്സർവം രക്ഷ മേ ദേവി! ജയന്തീ പാപനാശിനീ ॥ 42 ॥ പദമേകം ന ഗച്ഛേത്തു യദീച്ഛേച്ഛുഭമാത്മനഃ । കവചേനാവൃതോ നിത്യം യത്ര യത്രൈവ ഗച്ഛതി ॥ 43 ॥ തത്ര തത്രാർഥലാഭശ്ച വിജയഃ സാർവകാമികഃ । യം യം ചിന്തയതേ കാമം തം തം പ്രാപ്നോതി നിശ്ചിതം ॥ 44 ॥ പരമൈശ്വര്യമതുലം പ്രാപ്സ്യതേ ഭൂതലേ പുമാൻ । നിർഭയോ ജായതേ മർത്യഃ സംഗ്രാമേഷ്വപരാജിതഃ ॥ 45 ॥ ത്രൈലോക്യേ തു ഭവേത്പൂജ്യഃ കവചേനാവൃതഃ പുമാൻ । ഇദം തു ദേവ്യാഃ കവചം ദേവാനാമപി ദുർലഭം ॥ 46 ॥ യഃ പഠേത്പ്രയതോ നിത്യം ത്രിസന്ധ്യം ശ്രദ്ധയാന്വിതഃ । ദൈവീകലാ ഭവേത്തസ്യ ത്രൈലോക്യേഷ്വപരാജിതഃ । 47 ॥ ജീവേദ്വർഷശതം സാഗ്രമപമൃത്യുവിവർജിതഃ । നശ്യന്തി വ്യാധയഃ സർവേ ലൂതാവിസ്ഫോടകാദയഃ ॥ 48 ॥ സ്ഥാവരം ജംഗമം ചൈവ കൃത്രിമം ചൈവ യദ്വിഷം । അഭിചാരാണി സർവാണി മന്ത്രയന്ത്രാണി ഭൂതലേ ॥ 49 ॥ ഭൂചരാഃ ഖേചരാശ്ചൈവ ജുലജാശ്ചോപദേശികാഃ । സഹജാ കുലജാ മാലാ ഡാകിനീ ശാകിനീ തഥാ ॥ 50 ॥ അന്തരിക്ഷചരാ ഘോരാ ഡാകിന്യശ്ച മഹാബലാഃ । ഗ്രഹഭൂതപിശാചാശ്ച യക്ഷഗന്ധർവരാക്ഷസാഃ ॥ 51 ॥ ബ്രഹ്മരാക്ഷസവേതാലാഃ കൂഷ്മാണ്ഡാ ഭൈരവാദയഃ । നശ്യന്തി ദർശനാത്തസ്യ കവചേ ഹൃദി സംസ്ഥിതേ ॥ 52 ॥ മാനോന്നതിർഭവേദ്രാജ്ഞസ്തേജോവൃദ്ധികരം പരം । യശസാ വർധതേ സോഽപി കീർതിമണ്ഡിതഭൂതലേ ॥ 53 ॥ ജപേത്സപ്തശതീം ചണ്ഡീം കൃത്വാ തു കവചം പുരാ । യാവദ്ഭൂമണ്ഡലം ധത്തേ സശൈലവനകാനനം ॥ 54 ॥ താവത്തിഷ്ഠതി മേദിന്യാം സന്തതിഃ പുത്രപൗത്രികീ । ദേഹാന്തേ പരമം സ്ഥാനം യത്സുരൈരപി ദുർലഭം ॥ 55 ॥ പ്രാപ്നോതി പുരുഷോ നിത്യം മഹാമായാപ്രസാദതഃ । ലഭതേ പരമം രൂപം ശിവേന സഹ മോദതേ ॥ 56 ॥ ॥ ഇതി ദേവീ മാഹാത്മ്യം ദേവി കവചം ॥