ശ്രീചാമുണ്ഡാ മാഹാമായാ ശ്രീമത്സിംഹാസനേശ്വരീ । ശ്രീവിദ്യാവേദ്യമഹിമാ ശ്രീചക്രപുരവാസിനീ ॥ 1 ॥ ശ്രീകണ്ഠദയിതാ ഗൗരീ ഗിരിജാ ഭുവനേശ്വരീ । മഹാകാലീ മഹാലക്ഷ്മീഃ മഹാവാണീ മനോന്മനീ ॥ 2 ॥ സഹസ്രശീർഷസമ്യുക്താ സഹസ്രകരമണ്ഡിതാ । കൗസുംഭവസനോപേതാ രത്നകഞ്ചുകധാരിണീ ॥ 3 ॥ ഗണേശസ്കന്ദജനനീ ജപാകുസുമഭാസുരാ । ഉമാ കാത്യായനീ ദുർഗാ മന്ത്രിണീ ദണ്ഡിനീ ജയാ ॥ 4 ॥ കരാംഗുലിനഖോത്പന്നനാരായണദശാകൃതിഃ । സചാമരരമാവാണീസവ്യദക്ഷിണസേവിതാ ॥ 5 ॥ ഇന്ദ്രാക്ഷീ ബഗലാ ബാലാ ചക്രേശീ വിജയാംബികാ । പഞ്ചപ്രേതാസനാരൂഢാ ഹരിദ്രാകുങ്കുമപ്രിയാ ॥ 6 ॥ മഹാബലാദ്രിനിലയാ മഹിഷാസുരമർദിനീ । മധുകൈടഭസംഹർത്രീ മഥുരാപുരനായികാ ॥ 7 ॥ കാമേശ്വരീ യോഗനിദ്രാ ഭവാനീ ചണ്ഡികാ സതീ । ചക്രരാജരഥാരൂഢാ സൃഷ്ടിസ്ഥിത്യന്തകാരിണീ ॥ 8 ॥ അന്നപൂർണാ ജ്വലജ്ജിഹ്വാ കാലരാത്രിസ്വരൂപിണീ । നിശുംഭശുംഭദമനീ രക്തബീജനിഷൂദിനീ ॥ 9 ॥ ബ്രാഹ്മ്യാദിമാതൃകാരൂപാ ശുഭാ ഷട്ചക്രദേവതാ । മൂലപ്രകൃതിരൂപാഽഽര്യാ പാർവതീ പരമേശ്വരീ ॥ 10 ॥ ബിന്ദുപീഠകൃതാവാസാ ചന്ദ്രമണ്ഡലമധ്യഗാ । ചിദഗ്നികുണ്ഡസംഭൂതാ വിന്ധ്യാചലനിവാസിനീ ॥ 11 ॥ ഹയഗ്രീവാഗസ്ത്യപൂജ്യാ സൂര്യചന്ദ്രാഗ്നിലോചനാ । ജാലന്ധരസുപീഠസ്ഥാ ശിവാ ദാക്ഷായണീശ്വരീ ॥ 12 ॥ നവാവരണസമ്പൂജ്യാ നവാക്ഷരമനുസ്തുതാ । നവലാവണ്യരൂപാഢ്യാ ജ്വലദ്ദ്വാത്രിംശതായുധാ ॥ 13 ॥ കാമേശബദ്ധമാംഗല്യാ ചന്ദ്രരേഖാവിഭൂഷിതാ । ചരാചരജഗദ്രൂപാ നിത്യക്ലിന്നാഽപരാജിതാ ॥ 14 ॥ ഓഡ്യാണപീഠനിലയാ ലലിതാ വിഷ്ണുസോദരീ । ദംഷ്ട്രാകരാലവദനാ വജ്രേശീ വഹ്നിവാസിനീ ॥ 15 ॥ സർവമംഗലരൂപാഢ്യാ സച്ചിദാനന്ദവിഗ്രഹാ । അഷ്ടാദശസുപീഠസ്ഥാ ഭേരുണ്ഡാ ഭൈരവീ പരാ ॥ 16 ॥ രുണ്ഡമാലാലസത്കണ്ഠാ ഭണ്ഡാസുരവിമർദിനീ । പുണ്ഡ്രേക്ഷുകാണ്ഡകോദണ്ഡാ പുഷ്പബാണലസത്കരാ ॥ 17 ॥ ശിവദൂതീ വേദമാതാ ശാങ്കരീ സിംഹവാഹനാ । ചതുഃഷഷ്ട്യുപചാരാഢ്യാ യോഗിനീഗണസേവിതാ ॥ 18 ॥ വനദുർഗാ ഭദ്രകാലീ കദംബവനവാസിനീ । ചണ്ഡമുണ്ഡശിരശ്ഛേത്രീ മഹാരാജ്ഞീ സുധാമയീ ॥ 19 ॥ ശ്രീചക്രവരതാടങ്കാ ശ്രീശൈലഭ്രമരാംബികാ । ശ്രീരാജരാജവരദാ ശ്രീമത്ത്രിപുരസുന്ദരീ ॥ 20 ॥ ശ്രീമച്ചാമുണ്ഡികാദേവ്യാ നാമ്നാമഷ്ടോത്തരം ശതം । പഠൻ ഭക്ത്യാഽർചയൻ ദേവീം സർവാൻ കാമാനവാപ്നുയാത് ॥ 21 ॥ ഇതി ശ്രീ ചാമുണ്ഡേശ്വരീ അഷ്ടോത്തരശതനാമ സ്തോത്രം ॥